Almaty kóshelerinen 10 myń tekshe metr qoqys shyǵaryldy
ALMATY. KAZINFORM - Almatyda 25-30 qarasha aralyǵynda «Taza Qazaqstan» jalpy respýblıkalyq baǵdarlamasy jáne «Almaty – bizdiń ortaq úıimiz» qalalyq naýqany aıasynda aýqymdy tazalaý jumystary júrgizildi.
Almaty ákimdiginiń málimetinshe, tazalyq aptalyǵy aıasynda qalalyq kommýnaldyq qyzmetter qalany qysqy maýsymǵa daıyndaýdy aıaqtady. Qysqy kezeńde megapolıs kóshelerin qardan tazalaý úshin 841 birlik tehnıka men 1 400 jol jumysshysy tartylatyn bolady. Jumystardy tıimdi júrgizý úshin «Almaty tazalyq» MKK avtoparki 32 zamanaýı mashınamen tolyqtyryldy. Sanıtarlyq tazalaý jalpy aýdany 25,1 mln sharshy metr 2 777 km 2 318 kósheni qamtıdy.
Kún saıyn 80 tehnıka men 320 jumysshy aryq jelisinen shamamen 160 tekshe metr laı men qoqysty shyǵarady.
Budan basqa, «Taza Qazaqstan» tujyrymdamasyna sáıkes ázirlengen jańa erejeler aıasynda búginde 2 myńǵa jýyq kásipker abattandyrý pasporttaryna qol qoıdy. Bul sharalar almatylyqtar men qala qonaqtary úshin qolaıly, qaýipsiz jáne ekologııalyq jaǵdaı jasaý strategııasynyń bir bóligi.
— Jalpy, búginde 10 493,5 tekshe metr qoqys, onyń ishinde 4 408 tekshe metr japyraqtar jınaldy. Gúlzarlarda, saıabaqtarda jáne basqa da qoǵamdyq oryndarda tártip ornatý jónindegi is-sharalarǵa belgili mádenıet qaıratkerleri, sportshylar, jastar jáne belsendi qala turǵyndary qatysty, — dep atap ótti ákimdikten.
Osyǵan deıin Almatynyń qysqa daıyndyǵy týraly jazǵan bolatynbyz.