Almaty kóshelerine 22 ardagerdiń jáne 15 tarıhı tulǵanyń esimi berildi

ALMATY. KAZINFORM — Almatyda qalalyq máslıhattyń XXXIV sessııasy ótip, onda depýtattar birqatar máseleni qarady.

Negizgi sheshimderdiń biri — qaladaǵy 156 ataýsyz kóshege ataý berý boldy. Onyń ishinde 22 kóshe Uly Otan soǵysy ardagerleriniń esimin ıelenedi, 15 kóshe «Tarıhı tulǵalar» tizimine engizilgen kórnekti qaıratkerlerdiń atyn alady. Olardyń qatarynda akademık Ábdýálı Qaıdar, arheolog Karl Baıpaqov, tarıhshy Saıym Balmuqanov, aýyr atletıkadan álem chempıony Anatolıı Hrapatyı, olımpıada chempıony, mánerlep syrǵanaýshy Denıs Ten, halyq jazýshysy Ábdijámil Nurpeıisov, aqyn-jazýshy Muzafar Álimbaev, abaıtanýshy Qaıym Muhamedhanov, qazaq mýltıplıkatsııasynyń negizin qalaýshy Ámen Qaıdarov jáne KSRO halyq artısi Natalıa Sats bar.

Al qalǵan 118 kóshe tanymdyq, tarıhı-mádenı jáne dástúrli ataýlarǵa ıe bolady. Bul usynystar aldyn ala máslıhat komıssııalarynda qaralyp, Qoǵamdyq keńespen kelisilgen jáne Respýblıkalyq onomastıkalyq komıssııanyń oń qorytyndysyn aldy.

Eske salaıyq, buǵan deıin Alataý aýdany boıynsha 10 kóshege, Áýezov aýdany boıynsha 4 kóshege, Bostandyq aýdany boıynsha 45 kóshege, Jetisý aýdany boıynsha 4 kóshege, Medeý aýdany boıynsha 7 kóshege, Naýryzbaı aýdany boıynsha 86 kóshege jańa ataý berý qarastyrylǵanyn jazǵanbyz.