Almaty kóshelerindegi jol jumystary qashan aıaqtalady
ALMATY. KAZINFORM — Almatyda bıyl jalpy uzyndyǵy 250 shaqyrym bolatyn 340 kóshe ortasha jóndeý jumystarymen qamtylǵan.
Jol ınfraqurylymyn damytý basqarmasynyń málimetinshe, jaqsy jáne qanaǵattanarlyq jaǵdaıdaǵy joldardyń úlesi 95%-ǵa deıin jetkizilmek. Búgin, 1 qyrkúıekke deıin jalpy uzyndyǵy 32 shaqyrym bolatyn 15 magıstraldyq kósheniń ýchaskelerinde jóndeý aıaqtalǵan. Olar — Zenkov, Jamaqaev, Jetisý, Shemıakın, Mámbetov, Rysqulbekov, Janqoja batyr, Eskendirov, Aqan seri, Manas, Ǵabdýllın, Jandosov, Ortalyq, Úshkempirov kósheleri men Qulja tasjolynyń ýchaskeleri.
Al Jubanov, Ótegen batyr kósheleriniń, sondaı-aq Altynsarın jáne Abaı dańǵyldarynyń aýmaqtarynda asfaltbeton jabynynyń tómengi qabaty tóselgen. Aldaǵy demalys kúnderi asfaltbeton qospasynan jabynnyń joǵarǵy qabaty tóselmek. Odan keıin jol tańbasy syzylady.
Sondaı-aq bıyl Alataý aýdanynda 99 kóshe, Áýezov aýdanynda — 16, Naýryzbaı aýdanynda — 19, Bostandyq aýdanynda — 39, Túrksib aýdanynda — 21, Jetisý aýdanynda — 44, Medeý aýdanynda — 78 jáne Almaly aýdanynda 1 kóshe ortasha jóndeýden ótip jatyr.
— Búginde jumystar 70%-ǵa oryndaldy, 31 qazanǵa deıin tolyq aıaqtaý josparlanǵan, — dep habarlady basqarmadan.
Vedomstvo ókilderi «Aqjar», «Boraldaı» jáne «Rahat-Mádenıet» shaǵyn aýdandarynda jalpy uzyndyǵy 96 shaqyrym bolatyn jańa joldyń qurylysyn júrip jatqanyn atap ótti. Qazir ol 80%-ǵa aıaqtalǵan.
Eske salaıyq, buǵan deıin qala turǵyndary jańa oqý jylyna deıin kóshelerde jol jumystarynyń aıaqtalmaýyna baılanysty alańdaýshylyq bildirdi. Osyǵan oraı, Almaty kósheleriniń kólik júktemesine daıyndyǵy týraly jazǵanbyz.
