Almaty kóshelerindegi SkyTrain qorshaýlary: qalada jańa kólik joly salyna bastady ma
ALMATY. KAZINFORM – Almaty kóshelerinde jańa kólik túriniń aty jazylǵan qorshaýlar paıda boldy.
Almatylyqtar arasynda Saın kóshesi men Ál-Farabı dańǵylynyń keı ýchaskelerinde SkyTrain dep jazylǵan qorshaýlar qyzyǵýshylyq týdyrdy. Turǵyndar qalada «jerústimen júretin relsti kóliktiń qurylysty bastaldy ma» degen boljam jasap otyr.
Atalǵan bannerlerge baılanysty qala ákimdigi túsinikteme berdi.
Resmı jaýapqa sáıkes, qazirgi ýaqytta SkyTrain jobasy aıasynda osy ýchaskede jobalyq qujattamany ázirleýge qajetti ınjenerlik-geologııalyq izdestirý jumystary júrgizilip jatyr.
- Atalǵan jumystar qysqa merzim ishinde oryndalady. Sýrette kórsetilgen ýchaskedegi jumystar 13 qazanda aıaqtalady, - dep habarlady ákimdikten.
Eske salaıyq, Almatyda jol-kólik ınfraqurylymyn birneshe baǵytta damytý josparlanyp otyrǵany habarlandy. Onyń ishinde LRT, SkyTrain jáne metro jelileri bar.
Sonymen qatar Almatyda 40 mlrd bólingen Raıymbek dańǵylyndaǵy BRT jobasy SkyTrain jobasyna baılanysty toqtatylǵanyn jazǵanbyz.
