Almaty kóshelerindegi qaýipsizdikti moto-patrýlder baqylaıdy
ALMATY. KAZINFORM — Almaty kóshelerine ákimshilik polıtsııanyń moto-patrýlderi shyqty.
Qalalyq polıtsııa departamentiniń málimetinshe, ákimshilik polıtsııa basqarmasynyń mamandandyrylǵan batalony quramyna kiretin bul bólimshe jol-kólik jaǵdaıyna jedel áreket etý, quqyq buzýshylyqtardyń aldyn alý jáne jol-kólik oqıǵalaryn azaıtý úshin, ásirese kólik qozǵalysy qarqyndy ýchaskelerde qyzmet atqarady.
Moto-patrýl quramynda 30 mototsıkl bar. Bul olardyń mobıldiligin qamtamasyz etip, jol qozǵalysy erejeleriniń buzylýyna jedel den qoıýǵa múmkindik beredi.
Almaty qalasy ákimshilik polıtsııa basqarmasynyń bastyǵy Ábdinur Tasybaevtyń aıtýynsha, moto-patrýl bólimsheleriniń negizgi mindeti — jol qozǵalysyna qatysýshylardyń qaýipsizdigin qamtamasyz etý jáne quqyq buzýshylyqtardyń aldyn alý.
— Moto-patrýlder jol jaǵdaıyndaǵy ózgeristerge jedel áreket etýge, quqyq buzýshylyqtardy der kezinde anyqtap, jolyn kesýge, sondaı-aq jol qozǵalysyna qatysýshylar arasyndaǵy tártipti arttyrýǵa múmkindik beredi. Basty maqsatymyz — azamattardyń qaýipsizdigin qamtamasyz etý jáne joldaǵy mádenıetti qalyptastyrý, — dedi ol.
Eske salaıyq, Almatyda «Quqyqtyq tártip» respýblıkalyq jedel-profılaktıkalyq is-sharasy bastaldy.
