Almaty kóshelerinde jarysqan taǵy bir top júrgizýshi ustaldy

ALMATY. KAZINFORM — Almatyda «Quqyqtyq tártip» respýblıkalyq jedel-profılaktıkalyq is-sharasy aıasynda jol qozǵalysy erejelerin óreskel buzǵan birneshe júrgizýshi ustalyp, jazaǵa tartyldy.

Almaty qalasy polıtsııa departamentiniń málimetinshe, túngi ýaqytta Ál-Farabı dańǵylynda bolǵan jaǵdaıǵa tártip saqshylary nazar aýdarǵan. Birneshe avtokólik jol erejelerin buzyp, ózara jarysqan. Onyń ishinde: jolaqty kúrt aýystyrý, jyldamdyqty asyrý jáne ózge qozǵalys qatysýshylaryna kedergi keltirý derekteri bar.

— Jedel áreket etý barysynda atalǵan kólikter toqtatyldy. Júrgizýshilerge qatysty qaýipti manevr jasaý jáne apattyq jaǵdaı týyndatqany úshin ákimshilik materıaldar toltyryldy. Kólikter mamandandyrylǵan aıyppul turaǵyna qoıyldy. Agressıvti júrgizý — qaýipsizdik talaptaryn sanaly túrde elemeý. Mundaı áreketter adamdardyń ómiri men densaýlyǵyna naqty qaýip tóndiredi. Osyndaı quqyq buzýshylyqtar mindetti túrde toqtatylady, — dedi Almaty qalasy PD Ákimshilik polıtsııa basqarmasynyń bastyǵy Ábdinur Tasybaev.

Eske salaıyq, buǵan deıin Almatynyń Ál-Farabı dańǵylynda jarys uıymdastyrǵan birneshe júrgizýshi jazalanǵanyn jazǵanbyz.

Odan buryn Ál-Farabı dańǵylynda úsh adamnyń ómirin qıǵan jol apaty boldy. Zeekr kóligi qarsy qozǵalys jolaǵyna shyǵyp ketip, Mercedes avtokóligimen soqtyǵysqan. BAQ pen áleýmettik jelide bul oqıǵaǵa kóshe jarystary sebep bolýy múmkin degen pikir aıtyldy.