Almaty kóshelerinde túnde jylqymen júrip, tynyshtyq buzǵandar jazalandy

ALMATY. KAZINFORM — Almaty kóshelerinde túngi ýaqytta birneshe azamat atpen júrgen.

Oqıǵanyń beınejazbasy áleýmettik jelide tarady.

Almaty qalasy polıtsııa departamentiniń málimetinshe, monıtorıng pen tekserý nátıjesinde bul azamattardyń jeke basy anyqtalǵan. Olar janýarlardy ustaý erejeleri men túngi ýaqytta tynyshtyqty buzý derekteri boıynsha ákimshilik jaýapkershilikke tartyldy.

— Qoǵamdyq tártipti buzý — jol berilmeıtin áreket. Almaty polıtsııasy Profılaktıka jylynda azamattardyń quqyqtary men qaýipsizdigin qamtamasyz etýge erekshe nazar aýdaryp otyr. Qalamyzdyń turǵyndaryn Zańdy qurmetteýge jáne qoǵamdyq tártip erejelerin saqtaýǵa shaqyramyz, — dedi Jergilikti polıtsııa qyzmeti basqarmasy bastyǵynyń orynbasary Tımýr Noǵaıbaev.

Eske salaıyq, buǵan deıin Almatyda ózendi jolmen shatastyrǵan eki júrgizýshi ákimshilik qamaýǵa alyndy.