Bıyl Almatyda 35 shaqyrym jańa jol salynady
ALMATY. KAZINFORM – Almatyda asfalt- beton qospasyn paıdalanyp joldardaǵy shuńqyrly jóndeý jumystary merziminen buryn bastalady.
Qalalyq mobıldilik basqarmasynan atap ótkendeı, jóndeý jumystary magıstraldyq jáne aýdandyq mańyzy bar kóshelerde júrgiziledi.
– Asfalt- beton zaýyty merziminen buryn iske qosyldy, ol «jyly asfalt» óndiredi. QR Kólik mınıstrliginiń málimetinshe, energııa únemdeıtin qospalary bar jańa tehnologııa asfaltty –5°C deıingi temperatýrada tóseýge múmkindik beredi. «QazjolǴZI» ázirlegen bul ádis respýblıkalyq tas jolda synalyp kórgen,– dep habarlady basqarmadan.
Jóndeý kezinde jol qozǵalysyna eshqandaı shekteý qoıylmaıdy.
Bıyl megapolıste 35 shaqyrym jańa jol salynyp, 300 shaqyrym jolǵa ortasha jóndeý jumystary júrgiziledi.
Sondaı-aq 2025 jyly Seıfýllın dańǵyly — Jansúgirov kóshesiniń qıylysynda jáne Rysqulov dańǵylynan Aqyn Sara kóshesine deıingi Saın kóshesiniń, sondaı-aq Abaı dańǵylynyń qala shekarasyna deıingi qıylysynyń qurylysyn aıaqtaý josparlanyp otyr.
Maqsat – 2024 jyly jol sapasyn 92%-ǵa deıin jetkizse, 2025 jyly bul kórsetkishti 95%-ǵa arttyrý.