Almaty kóshelerinde aýqymdy tazalyq jumystary júrip jatyr
ALMATY. KAZINFORM – «Taza Qazaqstan» respýblıkalyq baǵdarlamasy aıasynda «Almaty – bizdiń ortaq úıimiz» naýqany bastaldy.
Almaty ákimdiginiń málimetinshe, Naýryz aıynyń alǵashqy onkúndigi «Taza kósheler» degen ataýmen ótip jatyr. Bul kezeń jol jabynyn, qoǵamdyq kólik aıaldamalaryn tazalaýǵa, jol belgilerin jýyp-shaıýǵa, qosymsha qoqys jáshikterin ornatýǵa jáne qalanyń negizgi kóshelerin kórkeıtýge arnalǵan.
Jumysshylar qys kezinde jolǵa sebilgen qum men basqa da qoqystardy jınap jatyr.
– «Taza kósheler» naýqany aıasynda 180 jumysshy jáne 60 arnaıy tehnıka jumyldyryldy, magıstraldyq kósheler ǵana emes, olarǵa irgeles jatqan saıabaqtar, gúlzarlar, aryq júıeleri tazartylýda. Aýlalarda «Qasbetten qasbetke deıin» qaǵıdaty boıynsha tazalyq jumystary qolǵa alyndy, – dep habarlady ákimdikten.
Buǵan qosa, kóriktendirý tólqujaty engizilip jatyr. Aýdan ákimdigi qyzmetkerleri kásipkerler men menshik ıelerin aralap, kóriktendirý tólqujatyna qol qoıý qajettigin túsindirýde. Bul aımaǵyn taza ustaýǵa degen jaýapkershilikti arttyrady.
Eske salsaq, 1 naýryzdan 1 sáýirge deıin 4 kezeńge bólingen «Almaty – bizdiń ortaq úıimiz» naýqany ótip jatyr.
«Taza kósheler» (1-9 naýryz) – aıaldamalar men jol belgilerin jýý, qoqys jáshikterin ornatý, magıstraldy kóshelerdi kórkeıtý.
«Taza saıabaqtar, skverler jáne taýlar» (10-16 naýryz) – tabıǵı aımaqtarda senbilikter ótkizý, qoqys jınaý sharalary.
«Taza aýlalar» (17-23 naýryz) – aýlalardy, balalar jáne sport alańdaryn tazalaý, boıaý, kógaldandyrý baıqaýlary.
«Bizdiń qala – bizdiń maqtanyshymyz» (24 naýryz – 1 sáýir) – jappaı aǵash otyrǵyzý.
Buǵan deıin Almatyda 12 myńnan astam jańa qoqys jáshigi ornatylatyny jazǵan edik.