Almatyda bir táýlikte qansha qar jaýdy
ALMATY. KAZINFORM — Almaty kóshelerinen 9 600 tekshe metr qar shyǵaryldy.

Almatyda «Qazgıdromet» derekterine sáıkes, bir táýlikte 18 sm qar jaýǵan. Bul qańtardaǵy normanyń 31%-yna teń.
Túngi ýaqytta kóshelerdi tazalaý úshin 573 arnaıy tehnıka, sondaı-aq 711 jol jumysshysy jumyldyryldy. Qar shyǵarýǵa 203 samosval tartylǵan. 23 qańtar kúni tańerteń 9 600 tekshe metr qar qala syrtyna shyǵaryldy.

Al kúndizgi ýaqytta 475 birlik arnaıy tehnıka men 1 280 jol jumysshysy jumys istep jatyr.
— Shaǵyn kólemdi tehnıkanyń 95 birligin paıdalana otyryp, trotýarlardy, qoǵamdyq keńistikterdi jáne áleýmettik mańyzy bar obektilerge kireberisterdi mehanıkalandyrylǵan tazalaý júrgiziledi. Aýdan ákimdikterinde qar tazalaý jumystaryn baqylaý boıynsha táýlik boıy kezekshilik uıymdastyryldy, — dep habarlady ákimdikten.
Eske salaıyq, buǵan deıin Almatyda qalyń qar jaýǵanyn jazǵanbyz.