Almaty Koreıa Respýblıkasymen ozyq sý tehnologııalaryn engizý úshin seriktestik ornatty
ALMATY. KAZINFORM — «Almaty Sý» jáne Koreıa Respýblıkasy sýmen jabdyqtaýdy tsıfrlandyrý boıynsha birlesken jobalardy iske qosady.
Almaty qalasy megapolıstiń sýmen jabdyqtaý jáne káriz júıesin jańǵyrtý maqsatynda halyqaralyq yntymaqtastyǵyn nyǵaıtyp keledi. Almaty qalasy Energetıka jáne sý sharýashylyǵy basqarmasyna qarasty «Almaty Sý» kommýnaldyq memlekettik kásiporny Koreıa Respýblıkasynyń Ulttyq sý ónerkásibi klasterimen yntymaqtastyq týraly memorandýmǵa qol qoıdy.
Koreıanyń jetekshi kompanııalarymen seriktestik Almatydaǵy sý sharýashylyǵyn tsıfrlandyrýdy jedeldetýge, halyqaralyq tájirıbeni meńgerýge jáne sý resýrstaryn tıimdi basqarýǵa múmkindik beredi.
Almaty qalasy ákimdigi málimetinshe, Koreıa Respýblıkasy «Almaty Sý» kásipornynyń «Tsıfrlyq egiz» jobasyn júzege asyrýǵa atsalysady. Bul datchıkter, jasandy ıntellekt jáne sımýlıatsııa negizinde nysandardy naqty ýaqyt rejıminde baqylaýǵa, taldaýǵa jáne basqarýǵa múmkindik beretin vırtýaldy model.
Pılottyq joba retinde bas tazartý nysandaryna zamanaýı sý ólshegish quraldar ornatyldy. Aldaǵy ýaqytta «aqyldy» eseptegishterdi qoldaný boıynsha yntymaqtastyq aıasyn keńeıtý josparlanyp otyr. Sondaı-aq, energııa tıimdiligi men ekologııalyq turaqtylyqty arttyrýǵa baǵyttalǵan sý tazartý jáne sýmen qamtý júıelerin jańǵyrtý jónindegi jobalar qarastyrylǵan.
Bul seriktestik jańa tsıfrlyq sheshimderdi engizýge, qyzmet kórsetý sapasyn arttyrýǵa jáne resýrstardy tıimdi basqarýǵa jol ashady.
Koreıa Respýblıkasynyń Ulttyq sý ónerkásibi klasteri sýmen jabdyqtaý, sý tazartý jáne sý resýrstaryn basqarý salasyndaǵy memlekettik qurylymdar, ǵylymı-zertteý uıymdary men jeke kompanııalardy biriktiretin uıym.
«Almaty Sý» — Qazaqstandaǵy sýmen jabdyqtaý jáne sý burý salasyndaǵy eń iri kásiporyn. Ol Almaty qalasyn ǵana emes, oǵan irgeles eldi mekenderdi de sýmen qamtamasyz etedi.