Almaty kópsalaly kolledjinde «Ushqyshsyz ushý apparattary» quzyrettilik ortalyǵy ashyldy
ALMATY. KAZINFORM — Aldaǵy ýaqytta ortalyqta «Ushqyshsyz ushý apparattaryn paıdalaný jáne baǵdarlamalaý» jańa oqý baǵdarlamasy engiziledi. Baǵdarlama stýdentterge drondardy jobalaý, qurastyrý, basqarý jáne tehnıkalyq qyzmet kórsetý salasynda kásibı quzyrettilikterdi meńgerýge múmkindik beredi. Bul týraly Oqý-aǵartý mınıstrliginiń baspasóz qyzmeti habarlady.
Memleket basshysynyń tehnıkalyq jáne kásiptik bilim sapasyn arttyrý jáne jańa formattaǵy zamanaýı kadrlardy daıarlaý jónindegi tapsyrmalaryn júzege asyrý maqsatynda Almaty kópsalaly kolledjiniń bazasynda «Ushqyshsyz ushý apparattary» quzyrettilik ortalyǵy óz jumysyn bastady.
Qazaqstanda qazirgi eńbek naryǵynyń suranystaryna saı tehnıkalyq baǵyttaǵy sapaly mamandardy daıarlaýǵa erekshe nazar aýdarylyp otyr. Jańa ortalyqtyń ashylýy ınnovatsııalyq tehnologııalar men ınjenerlik bilimniń toǵysynda jańa múmkindikter ashatyn mańyzdy qadam. Aldaǵy ýaqytta ortalyqta «Ushqyshsyz ushý apparattaryn paıdalaný jáne baǵdarlamalaý» jańa oqý baǵdarlamasy engiziledi. Baǵdarlama stýdentterge drondardy jobalaý, qurastyrý, basqarý jáne tehnıkalyq qyzmet kórsetý salasynda kásibı quzyrettilikterdi meńgerýge múmkindik beredi.
Joba aıasynda kolledjdiń áleýmettik seriktesteri retinde Halyqaralyq bilim berý jáne ınnovatsııalar ortalyǵy men Qytaıdyń Zhongke Borui Education Technology Research Institute uıymdary qoldaý kórsetip jatyr.
— Bul joba tehnıkalyq jáne kásiptik bilim berý júıesin zamanaýı talaptarǵa saı damytýǵa baǵyttalǵan jáne eldiń ınnovatsııalyq áleýetin arttyrýǵa úles qosatyn bilim men ınnovatsııa salasyndaǵy halyqaralyq tıimdi yntymaqtastyqtyń aıqyn úlgisi. Ushqyshsyz ushý apparattary salasyndaǵy bilim berý baǵdarlamalaryn jetildirý arqyly Qazaqstan básekege qabiletti kadrlar daıarlaýǵa múmkindik alady, — deıdi Oqý-aǵartý mınıstrliginiń Tehnıkalyq jáne kásiptik bilim departamentiniń dırektory Áset Muhanbetov.
Quzyrettilik ortalyǵy ınnovatsııalyq bilim berý tehnologııalaryn engizý, stýdentterdiń robototehnıka, aerotúsirilim, 3D-kartografııa jáne ınfraqurylymdy monıtorıng salasyndaǵy praktıkalyq daǵdylaryn damytý, sondaı-aq pedagogterdi drondardy oqytý protsesinde tıimdi qoldanýǵa daıarlaý baǵyttary boıynsha jumys júrgizedi. Sonymen qatar munda halyqaralyq trenıngter, sheberlik sabaqtary men ushqyshsyz ushý apparattary boıynsha jarystar uıymdastyrylyp, sheteldik bilim berý jáne tehnologııalyq uıymdarmen seriktestik baılanystar keńeıtiledi.
Aıta ketelik elimizde 100-ge jýyq mektep biryńǵaı dızaınmen bezendirildi.