Almaty – Qonaev tasjolynda jappaı jol apaty boldy

ALMATY. KAZINFORM – Almaty-Qonaev tasjolynyń bir bóliginde kólikter apatqa ushyrap, adamdar zardap shekti.

Áleýmettik jelide Almaty-Qonaev tasjolynda bolǵan jol apatynyń vıdeosy tarady.

Beınejazbadan soǵylǵan kólikter men jaraqat alǵan adamdardy kórýge bolady.  

«Jumysqa kólikpen bara jatyr edik, mynandaı jaǵdaıdyń kýási boldyq. Kóliktiń astyna qysylyp qalǵan jas jigitti shyǵaryp aldyq. 17 jasta eken. Aman-esen. Oǵan qol ushymyzdy sozyp jatqanda taǵy bir jol apaty boldy»,- dep jazdy oqıǵanyń kýágeri.

Belgili bolǵandaı, jol apatynyń bári 26 qańtar kúni tańerteń Almaty-Óskemen tasjolynyń Almaty-Qonaev aqyly bóliginde bolǵan.

«Aldyn ala málimet boıynsha, Mitsubishi Legnum kóliginiń júrgizýshisi rýldi basqara almaı elektr baǵanasyna soǵylǵan, keıin ony evakýatsııalaý úshin Mazda kóligi kómekke keldi.Sol kezinde JAC kóliginiń júrgizýshisi qashyqtyqty saqtamaı Mazda-ǵa kelip soǵyldy»,- dep atap ótti «QazAvtoJol» ulttyq kompanııasynan.

Sonymen qatar, beınejazbaǵa pikir qaldyrǵan kóptegen jeli qoldanýshy joldardyń qardan tazartylmaǵanyn aıtyp shaǵymdandy.

«26 qańtar kúni saǵat 06:00 shamasynda bastalǵan qar saǵat 09:00-ge deıin jaýdy. №15 jol ýchaskesinde qardan tazartý jumystary júrgizilip, kóktaıǵaqqa qarsy qum sebildi. Oǵan 12 tehnıka men 22 jumysshy jumyldyryldy», - dep jaýap berdi kompanııadan.

Qazirgi ýaqytta Almaty – Qonaev tasjolynyń aqyly bóliginde qozǵalys tolyǵymen qamtamasyz etilgen.