Almaty-Qaskeleń jáne Almaty-Talǵar joldary qashan keńeıtiledi
QONAEV. KAZINFORM – Almaty qalasyn oblyspen jalǵaıtyn joldarda uzyn-sonar keptelis úırenshikti kórinis. Bul másele ishinara sheshilýi úshin jol ýchaskeleri birneshe jolaqqa keńeıýi kerek.
QazAvtojol kompanııasynyń málimetinshe, megapolıstiń batysyndaǵy Uzynaǵash, Shamalǵan, Qaskeleń jáne basqa da aýyldardy qalamen baılanystyratyn respýblıkalyq jol arqyly kúnine 60 myń kólik júredi. Buǵan deıin «Almaty-Bishkek» avtomobıl jolynyń 19-27 km (Qaskeleń – Úlken Almaty avtomobıl aınalma joly) ýchaskesin kúrdeli jóndeý jobalaý-izdestirý jumystary júrgizilip jatqanyn jazǵanbyz.
Joba qandaı satyda ekenin anyqtaý úshin jáne qurylys jumystarynyń merzimin naqtylaý úshin ulttyq kompanııaǵa taǵy júgindik. QazAvtojol jaýabyna sáıkes, «Almaty – Bishkek» avtomobıl jolynyń 19-27 km aralyǵyndaǵy ýchaskesindegi kúrdeli jóndeý jumystary boıynsha jobalaý-izdestirý jumystary aıaqtalǵan, jobalaý-smetalyq qujattamasy tolyq daıyn.
– Qazirgi tańda joba memlekettik saraptamada qaralyp jatyr. Qorytyndy nátıjeni bıyl sáýir aıynda alý josparlanǵan. Qurylys-montajdaý jumystaryna arnalǵan konkýrs memlekettik saraptamanyń oń qorytyndysy alynǵannan keıin jáne tıisti bıýdjet qarajaty bólingen jaǵdaıda jarııalanady, - dep naqtylady kompanııadan.
Sonymen qatar QazAvtojol jobany júzege asyrý úshin 3 jylǵa jýyq ýaqyt ótetin atap ótti.
– Joba boıynsha qurylys-montajdaý jumystarynyń uzaqtyǵy - iske asyrý bastalǵan sátten bastap 33 aı, - delingen jaýapta.
Qandaı qurylys júrgiziledi
Jalpy joba boıynsha Qaskeleń men Úlken Almaty avtomobıl aınalma joly arasyndaǵy jol bóligi 4 jolaqtan 8 jolaqqa deıin (ár baǵytta 4 jolaqtan) keńeıtilmek.
Odan bólek:
– «taǵa» úlgisindegi eki kólik aıryǵyn salý;
– 9 jerústi jaıaý júrginshiler ótkelin ornatý;
– kósheni jaryqtandyrý júıesin montajdaý;
– avtojol boıymen trotýarlar salý;
– ózge de jol ınfraqurylymyn jańǵyrtý kózdelgen.
QazAvtojol boljamy boıynsha kúrdeli jóndeý jumystary aıaqtalyp, nysan paıdalanýǵa berilgennen keıin joldyń ótkizý qabileti 61 paıyzǵa ulǵaıýy qajet.
– Bul óz kezeginde jol júktemesin edáýir tómendetip, kólik keptelisin azaıtýǵa jáne kólik qaýipsizdigin arttyrýǵa múmkindik beredi, - dep túsindirdi kompanııa ókilderi.
Almaty-Talǵar jolynyń jobasy
Eńbekshiqazaq jáne Talǵar aýdandarynyń turǵyndary qalaǵa qatynaıtyn Almatynyń shyǵysyndaǵy negizgi jol qazir 2 jolaqty. Bul jol arqyly kúndelikti 40 myńǵa jýyq kólik júredi. Byltyr Talǵar aýdanynyń ákimi Tańat Aıdarbekov agenttik tilshisine bergen suhbatynda Besaǵashtan Talǵar qalasyna deıin joldy keńeıtý jobasyn QazAvtojol kompanııasy ázirlep jatqanyn aıtqan edi.
Kazinform saýalyna jaýap bergen ulttyq kompanııa «Almaty – Talǵar – Báıdibek bı» respýblıkalyq mańyzy bar avtomobıl jolynyń 13–21 shaqyrym aralyǵyn kúrdeli jóndeý boıynsha jobalaý-izdestirý jumystary aıaqtalý satysynda ekenin atap ótti.
– Jobalyq qujattama memlekettik saraptamaǵa joldaýǵa daıyndalyp jatyr. Qujattar osy jyldyń aqpan–naýryz aılarynda jiberilmek. Qurylys-montajdaý jumystary tıisti bıýdjet qarajaty ýaqtyly bólingen jaǵdaıda 2026 jyly bastalady, - dep habarlady QazAvtojol.
Kúrdeli jóndeý jobasy aıasynda isteletin jumystar:
– joldy tórt jolaqqa deıin keńeıtý (ár baǵytta eki jolaqtan);
– ýchaskeniń búkil uzyndyǵy boıynsha kósheni jaryqtandyrý;
– trotýarlar salý;
– jol jamylǵysyn jańartý;
– ınjenerlik jáne ózge de ınfraqurylymdy jańǵyrtý.
Eske salaıyq, buǵan deıin Almaty oblysynda aýdan joldaryn jóndeýge bıyl 25 mlrd teńge bólingenin jazǵanbyz.