Almaty — Qaskeleń tasjolyn 8 jolaqqa keńeıtýge qansha qarajat jumsalady
QONAEV. KAZINFORM — Almaty oblysynda respýblıkalyq mańyzy bar Almaty — Bishkek tasjolynyń keńeıtý jumystary bastalyp ketti.
Almaty oblysy Jolaýshylar kóligi jáne avtomobıl joldary basqarmasynyń málimetinshe, respýblıkalyq mańyzy bar Almaty — Bishkek tasjolynyń 19-dan 27-shaqyrymyna deıingi ýchaskesi tórt jolaqtan segiz jolaqqa deıin keńeıtiledi. Bul jumysqa jalpy 33,9 mlrd teńge jumsalady. Búgingi tańda jobany júzege asyrýǵa 2,5 mıllıard teńge bólingen. Qarjylandyrý Qazaqstan damý bankiniń qarajaty esebinen qarastyrylǵan.
Qazirgi ýaqytta ákimdik tarapynan joldy keńeıtý úshin memleket muqtajy úshin jer telimderin alý jumystaryn júrgizip jatyr. Odan bólek ýchaskeniń ózinde qurylys-montajdaý jumystary bastalyp ketti.
— 2026 jyldyń 20 shildesinen bastap «Álem Trans Jol» JShS merdiger uıymy qurylys-montajdaý jumystaryna kiristi. Jobany aıaqtaý merzimi — 2027 jyldyń jeltoqsany, — dep habarlady basqarmadan.
Atalǵan avtojoldy keńeıtý Almaty kireberisindegi júktemesi joǵary jolda ótkizý qabiletin arttyrýǵa jáne Qaskeleń baǵytyndaǵy keptelisti azaıtýǵa múmkindik beredi dep kútiledi.
Eske salaıyq, jyl basynda Almaty-Qaskeleń jáne Almaty-Talǵar joldary qashan keńeıtiletinin jazǵanbyz.
Al bıyl shilde aıynda Prezıdent tapsyrmasyna sáıkes, Almaty-Qaskeleń avtojolyn keńeıtý jumysy bastalatyny belgili boldy.
