«Almaty – Qaskeleń» avtojoly segiz jolaqqa deıin keńeıtiledi
ASTANA.KAZINFORM - Prezıdent tapsyrmasyna sáıkes Premer-mınıstr Oljas Bektenov Prezıdent Qasym-Jomart Toqaevtyń tapsyrmalaryn júzege asyrý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
– Memleket basshysy Almaty qalasy men oǵan irgeles eldi mekender turǵyndary tarapynan «Almaty – Qaskeleń» jolyndaǵy kólik qozǵalysynyń joǵary júktemesine qatysty aıtylyp júrgen shaǵymdarǵa nazar aýdardy. Prezıdent joldy keńeıtý jobasyn dereý bastaý týraly tapsyrma berdi. Merdiger osy aptanyń sońyna deıin qajetti tehnıka men jumys kúshin jumyldyrýy qajet. Qurylys jumystaryn dúısenbi, 20 shilde kúni bastaý kerek. Memleket basshysynyń tapsyrmasy sapaly ári barynsha qysqa merzimde oryndalýy tıis, - dep tapsyrdy Oljas Bektenov.
Premer-mınıstr joba qunynyń bekitilgenin jáne onyń ósýine jol berilmeıtinin atap ótti.
– Jobany júzege asyrý maqsatynda satyp alynatyn jer ýchaskelerine qatysty alypsatarlyqqa jol berilmeýi úshin olardyń qunyn keshegi, 14 shildedegi jaǵdaı boıynsha belgileý qajet, - dep atap ótti Oljas Bektenov.
Kólik mınıstri Nurlan Saýranbaev Almatydan Qaskeleń qalasyna deıingi avtojol ýchaskesiniń 8 shaqyrymdyq bóligin 8 jolaqqa deıin keńeıtý jobasyn usyndy. Jobany qarjylandyrý Qazaqstannyń Damý banki arqyly júzege asyrylady.
Eki jolaıryq pen 9 jerústi jaıaý júrginshiler ótkelin salý josparlanyp otyr. Nátıjesinde atalǵan ýchaskeniń ótkizý qabileti 2 ese artady. Qurylys jumystaryn aıaqtaý jáne paıdalanýǵa berý 2027 jylǵy jeltoqsan aıyna josparlanǵan.
Almaty qalasynyń ákimi Darhan Satybaldynyń málimetinshe, megapolıske kún saıyn 300 myń avtokólik kiredi. Qala ishindegi avtokólikterdi qosa eseptegende, jol qozǵalysynyń jalpy kólemi 1 mıllıonnan asady.
Almaty – Qaskeleń avtomobıl joly Almaty aglomeratsııasyndaǵy eń qarqyndy qozǵalys júretin jol ýchaskeleriniń biri. Bul joldaǵy qozǵalys qarqyndylyǵy táýligine shamamen 60 myń avtokólikke jetedi. Sondaı-aq Abaı dańǵylyn Úlken Almaty aınalma avtomobıl jolyna deıin uzartý jobasy týraly baıandaldy.
lmaty oblysynyń ákimi Marat Sultanǵazıev Uzynaǵash aýylynan uzyndyǵy 32 shaqyrym bolatyn balama jol salý jumystarynyń bastalǵany týraly baıandady. Bul joba Almaty – Qaskeleń tas jolyna júktemeni azaıtýǵa múmkindik beredi. Atalǵan jobalar boıynsha Almaty qalasy men Almaty oblysynda jer máselelerin sheshý jumystary sońǵy satyda tur. Sonymen qatar Almaty aglomeratsııasyn damytý jónindegi sharalar talqylandy.
Almaty – Esik jáne Almaty – Talǵar baǵyttaryndaǵy avtojol jobalary qaraldy. Sondaı-aq relsti kólikti jáne Almaty metropolıtenin damytý baǵytyndaǵy jumystar júrgizilip jatyr.
Oljas Bektenov Almaty aglomeratsııasynyń kólik baılanysy máselelerin keshendi sheshý boıynsha birqatar tapsyrma berdi.
Temirjol arqyly tranzıttik tasymal kólemin jylyna 55 mln tonnaǵa jetkizý josparlanyp otyrǵanyn jazǵan edik.
