Almaty-Qaskeleń arasyndaǵy keptelis: 4 jolaqty joldar qashan salynady
ALMATY. KAZINFORM — Almaty mańyndaǵy keptelis máselesi aldaǵy jyly qalaı sheshiledi? Kazinform tilshisi anyqtap kórdi.
Almatyǵa kún saıyn oblystan myńdaǵan kólik kiredi. Bul qala kireberisindegi joldarda kúndelikti uzyn-sonar keptelistiń qalyptasýyna ákeledi. Solardyń biri — Almaty-Bishkek avtojoly, onyń ishinde Qaskeleń men Altyn orda arasyndaǵy aýmaqty erekshe atap ótýge bolady.
Bul máseleniń qozǵalyp júrgenine az ýaqyt bolǵan joq. Byltyr «Altyn Orda» mańyndaǵy keptelisti joıý úshin qandaı jumystar isteletinin jazǵanbyz.
Alaıda ol ýaqyttan beri avtojolda aıtarlyqtaı ózgeris bolǵan joq. Sondyqtan QazAvtoJol Almaty oblystyq fılıalyna saýal joldap, 2026 jyly naqty ne isteletinin suradyq.
— Qazirgi ýaqytta apattyq jaǵdaılar sanyn tómendetý jáne keptelisti azaıtý maqsatynda respýblıkalyq mańyzy bar «Almaty-Bishkek» avtomobıl jolynyń 19-27 km (Qaskeleń — Úlken Almaty avtomobıl aınalma joly) ýchaskesin kúrdeli jóndeý jobalaý-izdestirý jumystary júrgizilip jatyr. Osy joba aıasynda qozǵalys jolaqtaryn 4-ten 8-ge deıin keńeıtý, «taǵa» tıpti eki kólik aıryqtary, sondaı-aq jerústi jaıaý júrginshiler ótkeli qurylysy qarastyrylǵan, — dep habarlady QazAvtoJol.
Resmı jaýapqa sáıkes, jobalaý-izdestirý jumystaryn aıaqtalý merzimi — 2025 jyldyń jeltoqsan aıy, memlekettik saraptamanyń oń qorytyndysyn alý — 2026 jyldyń aqpan aıyna kózdelgen.
— 2026 jylǵa qarjy qarastyrylǵan jaǵdaıda qurylys-montajdaý jumystaryna merdiger mekeme anyqtaý maqsatynda baıqaý jarııalanytyn bolady. Atalǵan jobany júzege asyrý úshin qurylys-montajdaý jumystary kezinde qozǵalysqa shekteý qoıylmaıdy, kólik qozǵalysy kezek-kezeńimen bir baǵytpen uıymdastyrylady, — delingen jaýapta.
Sonymen qatar kompanııanyń Almaty oblystyq fılıaly keptelisterdi azaıtý jáne kólik qozǵalysyn retteý qazir jańa baǵdarshamdardy ornatý jumystary júrip jatqanyn atap ótti.
Eske salaıyq, buǵan deıin Kazinform tilshisi Uzynaǵash pen Almaty arasynda qarbalas ýaqyttarda jol júrip, keptelis máselesin óz kózimen kórip qaıtty.