Almaty qashan tolyqtaı gazǵa kóshedi

«Almaty elektr stantsııalary» basqarma tóraǵasy Baýyrjan Qalıevtiń aıtýynsha, kompanııa quramyna jalpy elektr qýaty 1235,7 MVt, jylý qýaty 4039 Gkal/saǵ bolatyn alty energııa kózi kiredi. Olar – №1, №2 jáne №3 jylý elektr ortalyqtary (JEO), GES kaskady, Qapshaǵaı GES-i jáne Batys jylý kesheni.

Qazir kompanııa Almatynyń jyldyq elektr energııasy tutynýynyń shamamen 40%-yn, al jylý energııasy tutynýynyń 70%-yn qamtamasyz etedi.

– Qalada elektr energııasyn jyldyq tutyný kólemi - shamamen 10–11 mlrd kVt·saǵ. Al bizdiń energııa kózderimizdiń jyldyq jıyntyq óndirisi - shamamen 5 mlrd kVt·saǵ. Onyń ishinde qalaǵa naqty beriletin elektr energııasynyń kólemi 4,2 mlrd kVt·saǵ bolady, – dedi Baýyrjan Qalıev.

Onyń aıtýynsha, Almatyda elektr energııasyn tutyný kólemi artyp keledi. Eger 2017 jyly óńirdegi elektr energııasyn tutynýdyń eń joǵary kórsetkishi shamamen 1540 MVt bolsa, 2026 jyly 2068 MVt-qa jetken.

– Bul kórsetkish bıyl jazda tirkeldi. Eń joǵary júkteme artyp keledi. Jazda energııa kózderimizdiń qoljetimdi qýaty shamamen 500 MVt bolsa, qysta 850 MVt-qa jýyqtaıdy. Bul tańerteńgi jáne keshki eń joǵary júkteme kezinde energııa júıesiniń tolyq jumys isteýin qamtamasyz etýge jetkiliksiz. Sonyń saldarynan jalpy elektr energııasy balansyndaǵy ózimiz óndirgen elektr energııasynyń úlesi shamamen 25%-ǵa deıin tómendeıdi, – dedi ol.

Qoljetimdi qýatty arttyrý jáne energııa júıesiniń ıkemdiligin kúsheıtý úshin kompanııa №2 jáne №3 JEO aýmaǵynda eki jańa gaz elektr stantsııasyn salý jobalaryn júzege asyryp jatyr.

№2 JEO aýmaǵyndaǵy jańa stantsııanyń belgilengen elektr qýaty shamamen 556 MVt, al jylý qýaty 950 Gkal/saǵ bolady. Qazir munda iske qosý-baptaý jumystary júrgizilip jatyr.

Al №3 JEO aýmaǵynda elektr qýaty shamamen 544 MVt, jylý qýaty 165 Gkal/saǵ bolatyn gaz elektr stantsııasynyń qurylysy júrip jatyr. Ol elektr energııasyn óndirý kólemin tutyný ózgerisine qaraı jedel retteýge múmkindik beretin manevrlik qýat kózi retinde jumys isteıdi.

– Qazir №3 JEO aýmaǵynda gaz elektr stantsııasy salynyp jatyr. Ol tańerteńgi jáne keshki eń joǵary júktemeni jabýǵa, manevrlik qýat esebinen elektr energııasyna degen suranystyń sharyqtaý kezeńindegi qajettilikti qamtamasyz etýge múmkindik beredi. Munda jıilik pen qýatty avtomatty retteý júıesi ornatylady, – dedi Qalıev.

Ol jylý elektr ortalyqtary negizinen jylý energııasyn óndirýge baǵyttalǵanyn, al elektr energııasy jylýmen birge óndiriletinin atap ótti.

– Jańa stantsııalar qoljetimdi qýatty arttyrýǵa múmkindik beredi. Qosymsha qýat shamamen 450 MVt bolady, al jalpy qýat 1,1 GVt-qa jýyqtaıdy, – dep túsindirdi kompanııa basshysy.

Onyń sózinshe, jańa qýat kózderin iske qosý kompanııanyń jyldyq elektr energııasyn óndirý kólemin 5 mlrd-tan 8,2 mlrd kVt·saǵ-qa deıin arttyryp, óńir qajettiliginiń edáýir bóligin qamtamasyz etýge múmkindik beredi.

Jańa generatsııalyq qondyrǵylardy 2027 jyldan bastap iske qosý josparlanyp otyr.

Sonymen qatar eki jobanyń júzege asýy Almatyny energııamen tolyq qamtamasyz etý máselesin túbegeıli sheshpeıdi deıdi. Sebebi óńir qarqyndy damyp keledi, al qýat tapshylyǵy áli de saqtalyp otyr.

– Osyǵan baılanysty kompanııada №1 JEO men GES kaskadyn rekonstrýktsııalaý, sondaı-aq ózende kontrrettegish sý qoımasyn salý máseleleri talqylanyp jatyr. Jobalardyń iske asyrylýyn Energetıka mınıstrligin qosa alǵanda, barlyq múddeli organ baqylap otyr. Elektr energııasynyń jalpy balansyndaǵy óz úlesimizdi arttyramyz dep kútemiz, – dedi «AlES» basshysy.

Eske salaıyq, Almatyda JEO-2-nyń qashan gazǵa kóshetini habarlanǵan edi.