Almaty kameralary kólikte telefon ustaýdyń 1 myńnan astam deregin tirkedi
ALMATY. KAZINFORM — Almaty kameralary zańnamaǵa engizilgen ózgeristerge baılanysty jańa quqyq buzýshylyq túrlerin túsirip jatyr.
Bıyl 12 naýryzdan bastap QR Ákimshilik quqyq buzýshylyq týraly kodeksiniń 31-babyna QR Tsıfrlyq kodeksi aıasynda qabyldanǵan ózgerister kúshine endi. Ol boıynsha onyń ishinde kólik quralyn basqarý kezinde uıaly telefon paıdalaný jáne qaýipsizdik beldigin taqpaý derekterin tirkeı bastady.
Buryn avtomatty júıeler jyldamdyqty arttyrý, baǵdarshamnyń tyıym salatyn sıgnalyna ótý, jol belgileri men tańbalaryn saqtamaý, durys toqtamaý nemese turaq erejesin buzý, ozý qaǵıdalaryn buzý jáne jaıaý júrginshilerge jol bermeý syndy 6 túrin ǵana anyqtaıtyn.
Jańa erejeler kúshine engen soń, kameralardyń shyn máninde mundaı derekterdi tirkemeıtini týraly áleýmettik jelide pikir men boljamdar aıtyldy. Jaǵdaıdy naqtylaý úshin agenttik Almaty qalasynyń polıtsııa departamentine júgindi.
Megapolıs polıtsııasynyń jaýabyna sáıkes, 2026 jyldyń naýryz aıynda Almaty qalasy boıynsha QR ÁQBtK-niń 591-baby boıynda kólik júrgizip kele jatyp telefon qoldanǵan 1 myń 242 kólik júrgizýshisi ákimshilik jaýapkershilikke tartylǵan. Osy ýaqyt ishinde QR ÁQBtK-niń 593-baby boıynsha qaýipsizdik beldigin taqpaýdyń 1 myń 646 deregi tirkelip, olarǵa tıisti aıyppul salynǵan.
Eske salaıyq, Almatyda polıtsııanyń biryńǵaı beınemonıtorıng júıesine 62 myń 791 beınekamera qosylǵan. Jyl sońyna deıin taǵy 30 myń beınekamerany qosý josparlanyp otyr. Jalpy qalada 186 myń beınebaqylaý kamerasy jumys istep tur.
