Apatpen kúres: Qostanaı bıligi qandaı is-sharalardy júzege asyryp jatyr

QOSTANAI. KAINFORM - Qostanaı oblysyndaǵy jergilikti bılik sý tasqynymen belsendi kúres júrgizip jatyr. Aýqymdy qutqarý operatsııalary júrgizildi, dep habarlaıdy oblys ákimdiginiń baspasóz qyzmeti.

Oblys ákimi kesheden beri Arqalyq qalasynda. Ákiminiń baqylaýymen sý tasqynyna qarsy barlyq qajetti sharalar qolǵa alyndy. Turǵyndarmen kezdesý ótkizilip, tasqyn sýdan kelgen zalaldy baǵalaý jónindegi komıssııa quryldy. Sondaı-aq, Amangeldi, Jangeldi aýdandarynda jáne Arqalyq qalasynda TJ rejımi jarııalandy.

Qumar Aqsaqalovtyń aıtýynsha, ár adam kómek alady.

«Biz jergilikti ákimdikter, tótenshe jaǵdaılar salasy, polıtsııa, Qazavıaqutqarý qyzmetkerleri qatarynan 900-den astam adamdy jumyldyrdyq. Bizge Qaraǵandy, Qyzylorda qalalarynan kómek keldi. 438 tehnıka jumys isteıdi, onyń ishinde 156 motopompa, 20 júzý quraly, 4 áýe kemesi bar» - dep oblys ákimi túsinikteme berdi.

Oblystyq ákimdiktiń jedel shtabynyń aqparaty boıynsha sý tasqyny aımaǵynan 443 adam (Arqalyq q. – 307 adam, Amangeldi aýdany – 46 adam, Jangeldi aýdany – 90 adam) evakýatsııalandy.

Oblys boıynsha sý tasqyny kezeńinde barlyǵy 200 myń m3, ótken táýlikte 85 myń m3 sý soryldy, 4 myńnan astam qap qapshyq tóseldi, onyń ishinde osy táýlikte – 1 500 qap, 500 tonnaǵa jýyq ınertti materıaldar quıyldy, onyń ishinde sońǵy táýlikte – 300 tonna.

Sondaı-aq, óńir basshysy qabyldanyp jatqan sharalar týraly aqparat BAQ pen áleýmettik jelilerde jarııalanatynyn aıtty. Arnaıy shtab operatorlary turǵyndardyń qońyraýlaryna táýlik boıy jaýap beredi, tıisti kómek kórsetedi.

Aıta ketetini, sınoptıkterdiń málimetinshe, mundaı sý tasqyny buryn-sońdy bolmaǵan.

«Egistikterde ónimdi ylǵaldyń kóp mólsheri bar, ol ótken jyldan 179% - ǵa jáne normadan 144% - ǵa artyq. Ótken jyldyń qarasha jáne jeltoqsan aılarynda jaýyn-shashyn normadan 200% artyq boldy. Topyraqtyń ylǵaldylyǵyn eskere otyryp, qardyń kóp mólsheri jáne muz qabyǵynyń bolýy erigen sýdy sińirýdi qıyndatty, bul sýdyń betki aǵynyna ákeldi» - dep «Qazgıdromet» RMK Qostanaı oblysy boıynsha fılıalynyń dırektory Jazylbekov Samat Álısauly atap ótti.

Zardap shekkenderge kómek kórsetýge qoǵam belsendileri, eriktiler de qatysýda. Olar birigip, zardap shekken aýdandardyń turǵyndaryna kómektesedi: sýdy burý úshin arnalardy tesý, aýlalardy tazalaý jáne qar shyǵarý jumystaryn júrgizýde.

Mysaly, Arqalyq jastary sý basýǵa beıim úılerdi qardan tazartý jumystaryn júrgizýde. Jalpy 100 - ge jýyq erikti, 4 kolledj jáne óńirlik JOO ókilderi jumyldyryldy.

Sý tasqynynan zardap shekken Amangeldi aýdanynda kásipker, jergilikti «Samǵaý» kafesiniń ıesi Gaýhar Eskendirova sý tasqynymen kúresýshilerge azyq-túlik jetkizip berip turdy.

Oblys ákimdigi óńirdiń barlyq janashyr turǵyndaryna alǵysyn bildirip, tynyshtyqty saqtaýǵa shaqyrdy. Eshbir adam nazardan tys qalmaıtynyn eskertti.