Almatyda sel qaýpine baılanysty turǵyndar qaýipsiz jerge kóshirile bastady
ASTANA. KAZINFORM — Almaty qalasynyń Naýryzbaı aýdanynda sel qaýpine baılanysty ózen arnasy boıynda turatyn turǵyndardy aldyn ala evakýatsııalaý júrgizilip jatyr. Bul týraly TJM málim etti.
Azamattardyń qaýipsizdigin qamtamasyz etý maqsatynda olar Naýryzbaı aýdanyndaǵy mektepter bazasynda ashylǵan ýaqytsha qabyldaý pýnktterine ornalastyrylyp jatyr.
Jedel shtab qurylyp, azamattyq qorǵaý qyzmetteri jumys isteýde. Sondaı-aq 8 (727) 279-22-32 nómiri boıynsha jedel jeli iske qosyldy.
Barlyq is-sharalar josparly túrde júzege asyrylýda, jaǵdaı tolyq baqylaýda.
Eske sala keteıik, Almaty qalasynyń tótenshe jaǵdaılar departamenti qala turǵyndary men qonaqtaryna úndeý jasap, taýly aımaqqa barmaýǵa shaqyrdy.
