Almaty qalasynyń kommýnaldyq ınfraqurylymdy damytý basqarmasy basshysynyń orynbasary sottaldy

ALMATY. KAZINFORM — Almaty qalasy Medeý aýdandyq soty qalalyq kommýnaldyq ınfraqurylymdy damytý basqarmasy basshysynyń orynbasary N. Kajınniń úkimin jarııalady.

— Ol aýla aýmaqtaryn sanıtarlyq tazalaý boıynsha jumystardy memlekettik satyp alý sharttaryn jasasýǵa járdemdesý syltaýymen 19,5 mln teńge somasynda jergilikti kásipkerdiń aqshalaı qarajatyn ıemdengeni úshin kináli dep tanyldy, — delingen Antıkor habarlamasynda.

Kajınge memlekettik qyzmette jáne memlekettik sektor sýbektilerinde qyzmet atqarý quqyǵynan ómir boıyna aıyra otyryp, 6 jylǵa bas bostandyǵynan aıyrý jazasy taǵaıyndaldy.

— Osy úkimmen memleket kirisine aınalatyn jalpy somasy 21 mln teńgeden astam eki avtokóligi tárkilendi, — delingen habarlamada.

Sot aktisi zańdy kúshine engen joq.

Buǵan deıin jemqorlardy elden shyǵýǵa tyıym salý jaǵy qarastyrylyp jatqany týraly jazǵan edik.