Almaty qalasy óńirler arasynda syrtqy saýda kólemi boıynsha absolıýt kóshbasshy atandy

ASTANA. KAZINFORM - 2025 jyldyń sońǵy derekterine saı, Almaty qalasy óńirler arasynda syrtqy saýda kólemi boıynsha absolıýt kóshbasshy atandy, dep habarlaıdy QR Saýda jáne ıntegratsııa mınıstrliginiń baspasóz qyzmeti.

Megapolıstiń jalpy taýar aınalymy 7,2 mlrd AQSh dollaryn qurady, onyń 1,3 mlrd AQSh dollary eksportqa tıesili. Bul kórsetkish ótken jyldyń sáıkes kezeńimen salystyrǵanda 12,4%-ǵa joǵary.

Almaty joǵary qosylǵan quny bar ónimdi eksporttaıtyn ortalyq retinde óz pozıtsııasyn turaqty túrde nyǵaıtyp keledi. Eksport qurylymynda jetekshi oryndardy gaz týrbınalary, avıatsııa qozǵaltqyshtary, smartfondar, metall konstrýktsııalar, ystyqtaı ılengen symtemirler, legırlengen bolat, qant jáne mıneraldy tyńaıtqyshtar alady. Sonymen qatar, otandyq kúndelikti suranys taýarlarynyń úlesi de artyp keledi. Olardyń ishinde ushý apparattary, mıneraldy sý, janýarlarǵa arnalǵan jem, shokolad, teledıdarlar, kosmetıka jáne zergerlik buıymdar bar.

Qalanyń negizgi saýda seriktesteri – Qytaı ($1,8 mlrd), Reseı ($1,58 mlrd) jáne Koreıa Respýblıkasy ($346 mln).

«Almaty eksporty turaqty túrde ósip keledi. Biz jyl saıyn kóp kásipkerdiń syrtqy naryqtarǵa shyǵyp jatqanyn kórip otyrmyz. Ásirese mashına jasaý, hımııa, tamaq jáne jeńil ónerkásip salalarynda. Bul - óńirdiń qýatty bazasy men eksporttyq ekojúıeniń tıimdi jumys istep jatqanyn kórsetedi. Biz osyndaı tabysty mysaldar kóbeıe tússin degen maqsatta budan ári de elimizdiń barlyq óńirindegi eksporttaýshylarǵa qoldaý kórsetýdi jalǵastyramyz», - dedi QR Saýda jáne ıntegratsııa mınıstrligi janyndaǵy QazTrade kompanııasynyń basqarýshy dırektory Aınur Ámirbekova.

Osyǵan deıin «Baraholka» boıyndaǵy jabaıy saýdaǵa baqylaý kúsheıtiletini týraly jazdyq.