Almaty qalasy men oblysynda bazarlardy jańǵyrtý jumysy qalaı júrip jatyr
ALMATY. KAZINFORM — Almaty qalasy men oblysynda saýda bazarlaryn jańǵyrtý jónindegi Jol kartasyna sáıkes, 20 saýda orny jóndeýden ótýi qajet.
Bul týraly agenttik saýalyna jaýap bergen Saýda jáne ıntegratsııa mınıstrligi habarlady. Vedomstvo málimetinshe, byltyr Almaty qalasynda 10 bazarda jańǵyrtý jumystary bastalýy qajet edi. Alaıda «Tulpar» jáne «Azııa» bazarlary fýnktsıonaldyq maqsattarynyń ózgerýine baılanysty Jol kartasynan alyp tastalǵan. Al «Batyr», «Saýdakent», «Taýsamaly», «Bereke», «Jibek joly», «Arystan» bazarlary boıynsha jumystardy 2026 jyldyń sońyna deıin aıaqtaý kózdelgen.
Sondaı-aq bekitilgen Jol kartasy aıasynda Almaty oblysynda 10 bazardy jańǵyrtý josparlanǵan. Olar: «Altyn Orda», «Aısha Sıtı», «Aısha», «Alǵa», «Taýıp», «Sultan», «Toǵjan», «TalgarTehStroı», «JerAna», «Ortalyq». Vedomstvo óńirde bazarlardy jańǵyrtý jónindegi birqatar jobalar boıynsha bekitilgen kesteden artta qalǵandar bar ekenin joqqa shyǵarmady. Sondyqtan barlyq jumystardy tolyq aıaqtaý 2026 jyldyń birinshi jáne ekinshi jartysyna belgilengen.
— Mınıstrlik turaqty negizde barlyq óńirde kóshpeli is-sharalar, sondaı-aq ákimdiktermen, memlekettik organdarmen jáne bıznes-qoǵamdastyqpen keńester ótkizip keledi. Monıtorıng nátıjeleri boıynsha jekelegen ákimdikterdiń atyna baqylaýdy kúsheıtý qajettigi kórsetilgen hattar joldandy, — delingen mınıstrlik jaýabynda.
Bazarlarǵa arnalǵan tsıfrlyq júıe
Elimizde bazarlardyń kelbetin rettep, olardyń jańartýmen qatar, saýda ortalyqtaryndaǵy kóleńkeli ekonomıkanyń úlesin azaıtý jumysy da qolǵa alynǵan. Osy oraıda, Premer-mınıstrdiń orynbasary — Ulttyq ekonomıka mınıstri Serik Jumanǵarın Májilis depýtattarynyń saýalyna bergen jaýabynda «Altyn Orda» bazarynyń aqsha aınalymyn qadaǵalaıtyn «Digital Bazar» pılottyq jobasyn engiziletinin aıtty.
Saýda jáne ıntegratsııa mınıstrligi «Digital Bazar» jobasyna Almaty qalasynyń 5 bazary qatysyp, 5 000-nan astam kásipkerdi qamtylǵanyn habarlady. Alaıda olardyń qatarynda «Altyn Orda» bazary bolmaǵan.
— «Digital Bazar» pılottyq jobasy 2024 jyldyń qarasha aıynda Almaty qalasynda shaǵyn jáne orta bıznes sýbektileri úshin saýda bazarlaryn tsıfrlandyrý men negizgi protsesterdi jeńildetý maqsatynda iske qosyldy. 2024 jyldyń 31 jeltoqsanynda pılottyq kezeń sátti aıaqtaldy, — dep habarlady mınıstrlikten.
Vedomstvo málimetinshe, pılottyq joba qorytyndysy negizinde «Halyk Bank» AQ «re: Kassa» JShS-men birlesip kelesi kezeńge — bazarlar men saýda ortalyqtarynda turaqty negizde engiziletin masshtabty tsıfrlyq sheshim re: Sauda qurýǵa kirisken.
— Tsıfrlyq sheshimderdi barlyq bazar men saýda ortalyqtaryna engizý josparlanǵan re: Sauda — bul re: Kassa ekojúıesine negizdelgen biryńǵaı tsıfrlyq kabınet. Ol kásipkerlerdi, saýda ortalyqtary men bazarlardyń ákimshiligin, sondaı-aq memlekettik organdardy bir ashyq jáne tehnologııalyq kontýrda biriktiredi. Joba úsh negizgi mindetti sheshedi: bıznestiń zańdylyǵy men qaýipsizdigin qamtamasyz etý, saýda alańdarynyń basqarýshylyǵyn arttyrý jáne egjeı-tegjeıli ekonomıkalyq analıtıka qalyptastyrý, — dep túsindirdi mınıstrlikten.
Eske salaıyq, buǵan deıin Almatyda jańarmaǵan bazarlardyń jumysy toqtaıtynyn jazǵanbyz.