Almaty qalasy Bostandyq aýdany ákiminiń orynbasary aýysty
ASTANA. KAZINFORM — 2025 jylǵy Prezıdenttik jastar kadr rezerviniń múshesi Almaz Keńesbaı Almaty qalasy Bostandyq aýdany ákiminiń orynbasary qyzmetine taǵaıyndaldy. Bul týraly Memlekettik qyzmet ister agenttigi habarlady.
Almaz Abaıuly Keńesbaı Prezıdenttik jastar kadr rezervine «Áleýmettik saıasat, azamattyq qoǵam» baǵyty boıynsha qabyldanǵan. Bul onyń joǵary kásibı áleýetin jáne áleýmettik-ekonomıkalyq damýdyń ózekti mindetterin sheshýge daıyn ekenin aıǵaqtaıdy.
Ol Almaty energetıka jáne baılanys ýnıversıtetiniń «Elektr energetıkasy» mamandyǵyn, Qazaq ulttyq agrarlyq ýnıversıtetiniń «Quqyqtaný» mamandyǵyn támamdaǵan.
Eńbek jolyn 2017 jyly Almaty qalasy Alataý aýdany ákiminiń apparaty Kommýnaldyq sharýashylyq bóliminiń bas mamany qyzmetinen bastady.
2023 jyldan bastap Almaty qalasy Alataý aýdany ákimi apparaty Injenerlik jáne jol ınfraqurylymy bóliminiń basshysy boldy. Qazaqstan Respýblıkasy Prezıdenti janyndaǵy Memlekettik basqarý akademııasynda «Óńirlik damý» mamandyǵy boıynsha magıstr dárejesin alǵan.
2024 jyldan bastap Memlekettik basqarý akademııasynyń Almaty oblysy boıynsha fılıalynda aǵa oqytýshy, sondaı-aq Almaty qalasy Jastar saıasaty basqarmasy basshysynyń orynbasary qyzmetterin atqardy.
Prezıdenttik jastar kadr rezerviniń múshesin jaýapty basshylyq laýazymǵa taǵaıyndaý memlekettik basqarý júıesinde merıtokratııa qaǵıdatyn júıeli túrde iske asyrýdyń jáne jas basqarýshylar áleýetin tıimdi paıdalanýdyń aıqyn kórinisi sanalady.
Budan buryn Baǵdat Chaızada Túrkistan oblysy Tótenshe jaǵdaılar departamentin basqaratynyn jazǵan edik.