Almaty qalalyq TJD basshysy qyzmetinen ketti
ALMATY. KAZINFORM – Nurlan Atyǵaev Almaty qalalyq Tótenshe jaǵdaılar departamentiniń basshysy qyzmetinen bosatyldy.
Bul týraly Tótenshe jaǵdaılar mınıstrligi habarlady.
Vedomstvoda onyń jumystan ketýi Tótenshe jaǵdaılar departamentiniń qurylymyndaǵy kadrlyq ózgeristerge baılanysty dep túsindirdi.
Sonymen birge, baspasóz qyzmeti kadrlyq ózgeristerdiń messendjerler men áleýmettik jelilerde jaqynda Nazarbaev dańǵylynda avtokóliktiń órtenýine qatysty jaǵdaıǵa esh qatysy joq ekenin bólek atap ótti.
Nurlan Atyǵaev Almaty Tótenshe jaǵdaılar departamentin 2023 jyldyń qazan aıynan bastap basqardy.
Nurlan Atyǵaev 1978 jyly Kókshetaý oblysynda dúnıege kelgen. Qazaqstan Respýblıkasy Tótenshe jaǵdaılar agenttiginiń Kókshetaý tehnıkalyq ınstıtýtyn bitirgen.
Eńbek jolyn Soltústik Qazaqstan oblysy Memlekettik órtke qarsy qyzmetiniń Aıyrtaý aýdany № 7 órt sóndirý bóliminiń ınspektory bolyp bastady. Ár jyldary Soltústik Qazaqstan oblysynyń Tótenshe jaǵdaılar departamenti Taıynsha aýdany Tótenshe jaǵdaılar bóliminiń bastyǵy, memlekettik órt baqylaý basqarmasynyń bastyǵy, departament bastyǵynyń orynbasary laýazymynda qyzmet atqardy.
2020 jyldyń jeltoqsan aıynan 2023 jylǵy qazan aıyna deıingi aralyqta Aqmola oblysy Tótenshe jaǵdaılar departamenti bastyǵynyń orynbasary boldy.