Almaty qala qurylysynyń burynǵy basshysy kináli dep tanylsa, Dosaev qyzmetinen kete me
ALMATY. KAZINFORM – Almaty ákimi Erbolat Dosaev qala qurylysy basqarmasynyń burynǵy basshysy Almashan Ahmedjanovtyń qylmysy dáleldense, qyzmetinen ketýge daıyn ba?
Ákimniń Bostandyq aýdany turǵyndarymen kezdesýinde jýrnalısterdiń biri Almashan Ahmedjanovqa qatysty negizgi sot protsesi bastalǵanyn eske saldy.
«Sotta burynǵy basqarma basshysyna qatysty 150 betten asatyn aıyptaý aktisi oqyldy. Onda qandaı buzýshylyqtarǵa jol berilgeni týraly aıtylǵan. Bul siz qyzmette bolǵan kezde boldy», – dedi BAQ ókili.
Qala ákimi júıeli máselelerdiń bar ekenin moıyndap, ákimdik Sybaılas jemqorlyqqa qarsy is-qımyl agenttigi jáne ekonomıkalyq tergeý departamentimen birlese otyryp, aldyn alý sharalary aıasynda atalǵan problemany anyqtap, joıý jumystaryn júrgizgenin basa aıtty.
«Týyndaǵan máseleler boıynsha kim qandaı jaýapkershilikke tartylady degen saýalǵa keletin bolsaq, quzyrly quqyq qorǵaý organdary zańnamalyq normaǵa sáıkes sheshedi», - dedi Erbolat Dosaev.
Ákim qaramaǵyndaǵy qyzmetker, qala qurylysynyń burynǵy basshysyn sot kináli dep tapsa, qyzmetinen kete me? degen saýalǵa da jaýap berdi.
«Joq, qylmystyq is qozǵalǵan kezde ol meniń qaramaǵymda bolǵan joq», - dep jaýap berdi Dosaev.
Aıta keteıik, 4 qyrkúıek kúni Almatyda qala qurylysy basqarmasynyń burynǵy basshysyna qatysty basty sot otyrysy bastalǵan edi. Onda aıyptalýshy Almashan Ahmedjanovtan bólek, taǵy bes adam otyr, olardyń arasynda Almaty qalalyq jer qatynastary basqarmasynyń burynǵy basshysy Ardaq Samambetov te bar.
Eske salaıyq, byltyr shilde aıynda Sybaılas jemqorlyqqa qarsy qyzmet Almaty qala qurylysy basqarmasynyń burynǵy basshysyn ustaǵany belgili boldy.
Vedomstvonyń málimetinshe, sheneýnik jer telimderin berý jáne nysandardyń qurylysyna ruqsat berý kezinde qyzmettik ókiletterin asyra paıdalandy degen kúdikke ilingen.
Máselen, ol jeke turǵyn úı qurylysyna arnalǵan jer ýchaskelerinde, nysanaly maqsatyna qaramastan jáne qurylystyń tyǵyzdyǵyn eskermeı, jekelegen qurylys kompanııalarynyń múddesi úshin 2020-2023 jyldary 3 kóppáterli turǵyn úı kesheniniń qurylysyn zańsyz kelisken.
Nátıjesinde memleketke 307 mln teńgeden astam somaǵa jer ýchaskeleriniń tólenbegen kadastrlyq quny túrinde zalal keldi.
Osyǵan deıin Almaty ákimi Erbolat Dosaev óziniń otstavkaǵa ketýin talap etken petıtsııaǵa qatysty suraqqa jaýap bergen edi.
