Almaty — Ystyqkól jańa joly qashyqtyqty tórt esege deıin qysqartýy múmkin
ASTANA. KAZINFORM — Almaty men Ystyqkóldi jalǵaıtyn jańa halyqaralyq avtojol salynsa, qazirgi shamamen 400 shaqyrymdyq jol 100 shaqyrymǵa deıin qysqarýy yqtımal. Bul týraly Qazaqstandyq MJÁ ortalyǵy basqarma tóraǵasynyń birinshi orynbasary Aıdos Kóbetov málim etti.
Onyń aıtýynsha, qazir Almatydan Ystyqkólge deıingi jol shamamen 400 shaqyrym, oǵan orta eseppen 6–7 saǵat ketedi.
— Ystyqkól kórshiles el aýmaǵynda ornalasqanymen, Qazaqstannyń ońtústik óńiri turǵyndary jıi baratyn demalys oryndarynyń biri. Sondyqtan bul baǵytqa suranys joǵary. Osyny eskerip, halyqaralyq avtojol salý jobasy qarastyrylyp otyr. Joba júzege assa, jol shamamen 100 shaqyrymǵa deıin qysqarady, — dedi Aıdos Kóbetov.
Onyń málimetinshe, joba qazir tehnıkalyq-ekonomıkalyq negizdeme ázirleý kezeńinde. Keıin memlekettik saraptama júrgizilip, Qyrǵyzstan tarapy da óz baǵasyn beredi. Joba tıimdi dep tanylsa, kelesi kezeńde konkýrs jarııalanady.
— Qurylys shamamen úsh jylǵa sozylýy múmkin. Naqty merzim tehnıkalyq-ekonomıkalyq negizdeme daıyn bolǵan soń belgili bolady, — dedi ol.
Aıta keteıik, buǵan deıin Qazaqstan memlekettik-jekemenshik áriptestik jobalaryn iske asyrýda halyqaralyq qarjy ınstıtýttarymen yntymaqtastyqty kúsheıtip jatqany habarlanǵan edi.
