Almaty ıppodromynyń aýmaǵynda turǵyn úı kesheni salyna ma – ákimdik jaýap berdi
ALMATY. KAZINFORM – Áleýmettik jelide Almaty ıppodromynyń aýmaǵynda turǵyn úı kesheni salynady degen aqparat tarady.
– Almatyda 1930 jyly salynǵan tarıhı ıppodrom bireýlerdiń kóz qurtyna aınalypty. 40 gektardan astam jer qyp-qyzyl aqsha ǵoı. Soǵan tarsyldatyp turǵyn úı salmaqshy. Sonda tarıhı nysannyń quny kók tıyn ba? Onsyz da avtokólikke tolǵan Almaty kók tútinge qaqalyp tur, - delingen jazbada.
Alaıda «Tengrı Invest» JShS bul qaýesetti joqqa shyǵardy. Kompanııa dırektory Erjan Maılybaevtyń aıtýynsha, ıppodrom aýmaǵynda eshqandaı qurylys júrgizilip jatqan joq jáne turǵyn úı nemese kommertsııalyq nysandar salý jospary da joq.
– Ippodrom burynǵydaı jumys istep tur, munda at sporty jarystary ótkizilip, ulttyq sport túrlerin damytý isi jalǵasyp keledi, - dedi ol.
Almaty ákimdigi de bul aqparattyń negizsiz ekenin rastady.
– Egjeı-tegjeıli josparlaý jobasyna sáıkes, atalǵan aýmaq ıppodrom retinde bekitilgen, al ony buzý jóninde eshqandaı ruqsat berilgen joq. Almaty ıppodromy tarıhy tereń ári mádenı mańyzy zor nysan bolyp qala beredi. Munda dástúrli túrde elimizdegi at sporty men ulttyq mádenıetti nasıhattaýǵa baǵyttalǵan iri sporttyq jáne qoǵamdyq is-sharalar ótkizilip júr, - dep habarlady ákimdik.
Almaty ıppodromy – 1930 jyly salynǵan, Qazaqstandaǵy eń kóne jáne eń iri at sporty nysany. 2021 jyly ol «sáýlet jáne mádenıet eskertkishi» retinde memlekettik qorǵaýǵa alynǵan.
Al atbegiler Almaty ákimi Darhan Satybaldyǵa ashyq hat joldap, nysannyń apatty jaǵdaıǵa jetkenin jáne tarıhı mura retinde qorǵaýdy surady.
Atbegilerdiń hatynda ıppodromnyń qazirgi jaǵdaıy syn kótermeıtini aıtylǵan. Olar ǵımarattardyń tozyp, ınjenerlik jelilerdiń isten shyqqanyn, at qoralar men manejderdiń jóndeýdi qajet etetinin atap ótken.
– Ippodrom balshyq pen shańǵa batyp ketti, at tezegi jyldar boıy tazalanbaı, shybyn qaptady. Vet.lazaret jabyq jáne 15 jyldan astam jumys istemeıdi, syrttaǵy aýla dárethanalary – aǵashtary shirigen úıshik. Aýyz sý soǵys jyldaryndaǵydaı – táýligine úsh saǵat qana beriledi. Keshe aýmaqta jaryq joq, biz mektepten keıin atqa minýdi úırengisi kelgen balalar úshin qorqamyz, - delingen hatta.
Hat avtorlary ıppodromdy jekemenshik ıesiniń tıisti deńgeıde kútip ustamaı otyrǵanyn aıtyp, ony kommýnaldyq menshiktiń qaramaǵyna qaıtarýdy suraǵan.
– Menshik ıesi tarıhı jáne mádenı eskertkishti saqtaý jónindegi mindettemelerin uzaq jyldar boıy oryndamaýyna baılanysty ony kommýnaldyq menshikke ótkizýdi suraımyz, - deıdi atbegiler.
Buǵan deıin Almatynyń burynǵy ákimi Erbolat Dosaev qalalyq ıppodromnyń bolashaǵy týraly pikir bildirgen edi.
Dosaev sol kezde ıppodrom boıynsha kelissózder júrgizilip jatqanyn málimdegen edi.
Eske salaıyq, buǵan deıin de Almatydaǵy ıppodrom buzylyp, ornyna jańa turǵyn úı kesheni salynatyny týraly qaýeset aıtylǵan.
Alaıda eks-ákim Erbolat Dosaev mundaı qaýip joq ekenin aıtqan.