Almaty ıppodromy qaıtadan qala qaramaǵyna ótti
ASTANA. KAZINFORM — Almaty ıppodromy qala menshigine qaıtaryldy. Budan bylaı qalalyq ıppodrom tarıhı jáne sporttyq maqsattaǵy birtutas nysan retinde saqtalady.
Almaty sport basqarmasynyń ókilderiniń málimetinshe, qalanyń 2040 jylǵa deıingi Bas josparynda ıppodrom aýmaǵy tıisti fýnktsıonaldyq aımaqqa bekitilgen.
— Ony ózgertý josparda joq. Jer teliminiń de ıppodromdy paıdalaný jáne oǵan qyzmet kórsetýge arnalǵan nysanaly maqsaty saqtalady. Aldaǵy ýaqytta ıppodromdy keshendi damytý tujyrymdamasy ázirlenedi. Onyń sporttyq qyzmetin qalpyna keltirý, ınfraqurylymyn jańǵyrtý, trıbýnalaryn, at qoralaryn, sport joldaryn jáne ınjenerlik jelilerin jańartý josparlanyp otyr, — delingen habarlamada.
Vedomstvonyń málimetinshe, tujyrymdamany ázirleý kezinde zamanaýı sport ınfraqurylymyna qoıylatyn talaptar eskeriledi. Nysan óziniń negizgi maqsatyn jáne qalalyq ári respýblıkalyq jarystar ótkizý múmkindigin saqtaýǵa tıis.
— Qazirgi ýaqytta keshen qatty tozyp ketken, sondyqtan ony qalpyna keltirý jumystary kezeń-kezeńimen júrgiziledi, — dep habarlady basqarma.
Almaty ıppodromy 1930 jyly qurylǵan jáne Qazaqstan men Ortalyq Azııadaǵy jylqy sharýashylyǵy men at sportyna arnalǵan baıyrǵy nysandardyń biri bolyp esepteledi. Onyń aýmaǵy — 39,1 gektar. Tarıhı turǵydan ıppodrom shamamen 3 myń kórermenge jáne 300-ge jýyq jylqy ustaýǵa eseptelgen. Kúrdeli jóndeý jumystary 1965 jáne 1985 jyldary júrgizilgen. 1990 jyldardaǵy jekeshelendirý nátıjesinde ıppodrom memlekettik menshikten shyǵaryldy. 2001 jyly «Ippodrom» AQ bankrot bolǵannan keıin múliktik keshen jeke qurylymdarǵa satylyp ketken edi. Bul qoǵam belsendileri, atbegiler men at sporty jankúıerleriniń narazylyǵyn týdyrdy.
Eske salaıyq, buǵan deıin Almatydaǵy ıppodrom tóńireginde birneshe ret túrli talqylaý bolǵan. Qala ákiminiń orynbasary Beıbit Shahanov nysannyń endigi taǵdyryna qatysty túsinik bergen edi.
