Almaty ındýstrııalyq aımaǵy: megapolıstiń basty óndiris oryndary qalaı damıdy
ALMATY. KAZINFORM — Búginde Almatynyń basty óndiris oryndary qalanyń ındýstrııalyq aımaǵynda ornalasqan.
Kásiporyndar úshin arnaıy ınfraqurylym júrgizilgen qalanyń bul bóliginde ártúrli daıyn ónimder óndiriledi. Búginde tabysty jumys istep turǵan Almaty qalasynyń ındýstrııalyq aımaǵy (AIA) «Bıznestiń jol kartasy — 2020» bıznesti qoldaý men damytýdyń biryńǵaı baǵdarlamasyna sáıkes, Almaty qalasy ákimdiginiń sheshimimen 2012 jyly quryldy.
Al 2015 jyly «Almaty» Áleýmettik-kásipkerlik korporatsııasy» AQ (jalǵyz qatysýshynyń sheshimimen) «Almaty ındýstrııalyq aımaǵy» JShS basqarýshy kompanııasyn qurdy.
2019 jyldyń 3 sáýirinde Qazaqstan Respýblıkasynyń aýmaǵynda ındýstrııalyq aımaqtardy qurý, olardyń jumys isteýin retteıtin «Arnaıy ekonomıkalyq jáne ındýstrııalyq aımaqtar týraly» zań qabyldandy. Atalǵan zańǵa sáıkes, sol jyly «Almaty ındýstrııalyq aımaǵy» JShS 49 jylǵa óńirlik mańyzy bar memlekettik ındýstrııalyq aımaqtyń basqarýshy kompanııasy bolyp aıqyndaldy.
Keıin Almaty qalasy ákimdiginiń 2023 jylǵy 9 naýryzdaǵy № 1/173 qaýlysymen Alataý aýdanyndaǵy ındýstrııalyq aımaqqa respýblıkalyq mańyzy bar mártebe berildi.
AIA aýmaǵy qalaı keńeımek
Aldaǵy jyldary ındýstrııalyq aımaqtyń aýmaǵy keńeımek. Osy maqsatta 2028 jyldyń jeltoqsanyna deıin Alataý aýdany, «Alǵabas» shaǵyn aýdanynda ornalasqan 37 jer ýchaskesi memleket muqtajyna alynatynyn jazǵanbyz.
Kazinform saýalyna jaýap bergen «Almaty» Áleýmettik-kásipkerlik korporatsııasy» AQ basqarma tóraǵasynyń orynbasary Natalıa Lıvınskaıanyń aıtýynsha, Almaty ındýstrııalyq aımaǵynyń bastapqy aýdany 490 ga bolǵan. Onyń ishinde 164 ga — ınfraqurylymǵa, 326 ga — ınvestjobalarǵa arnalǵan. Sodan beri ol bir ret keńeıtilip, 2024 jyly taǵy 195 ga jer qosylǵan.
— 2029-2030 jyldary AIA-ǵa qosymsha 400 ga jer berý josparlanyp otyr. Qazirgi ýaqytta ındýstrııalyq aımaqtyń ınfraqurylymyna elektr jelisi, kóshe-jol jelisi, sýmen jabdyqtaý jáne sý burý, temirjol stantsııasy, gazben jabdyqtaý, optıkalyq-talshyqty baılanys jelileri, nóser kárizi kiredi, — dedi Natalıa Lıvınskaıa.
Investıtsııalyq jobalar men ótinimder
«Almaty» ÁKK» AQ basqarma tóraǵasynyń orynbasary jyl saıyn ındýstrııalyq aımaqta ınvestjobalardy iske asyrýǵa 120-ǵa jýyq ótinim túsetinin atap ótti. Onyń aıtýynsha, 2021-2026 jyldary barlyǵy 478 ótinim berilgen.
Onyń ishinde:
2021 jyly — 45 ótinim;
2022 jyly — 68 ótinim;
2023 jyly — 104 ótinim;
2024 jyly — 119 ótinim;
2025 jyly — 116 ótinim;
2026 jyly (15 naýryzǵa deıin) — 26 ótinim.
— Ótinishterdi berý jáne qabyldaýdyń barlyq rásimi indzone.kz saıtynda kórsetilgen. Sondaı-aq onda ınvestorǵa qoıylatyn talaptar da bar. Barlyq rásim 2019 jylǵy 4 sáýirdegi Qazaqstan Respýblıkasynyń «Arnaıy ekonomıkalyq jáne ındýstrııalyq aımaqtar týraly» Zańyna sáıkes júzege asyrylady, — dedi Natalıa Lıvınskaıa.
Qandaı ónimder óndiriledi
Qazir Almaty ındýstrııalyq aımaǵynda 147 ınvestıtsııalyq joba júzege asyrylyp jatyr. Onyń ishinde 57 kásiporyn iske qosylyp, onda 9 674 jumys orny qurylǵan. Investıtsııanyń jalpy kólemi — 884 mlrd teńge.
Búginde AIA aýmaǵynda óndiriletin ónimder qatarynda avtomobılder, jylytý bloktary men toraptary, syrtqy termopanelder, gazobloktar, taýar retindegi beton, fıbrotsementti panelder, PVH-panelder, jylytý radıatorlary, shyny paketter, elektrlik qaqpalar men esikter, turmystyq hımııa quraldary, kosmetıkalyq buıymdar, boıaý jáne laktar, kabeldik ónimder, bir rettik qaǵaz ydystar, munaı salasyna arnalǵan polıpropılen qubyrlary, shujyq ónimderi jáne t. b. bar.
— 2026 jyly jalpy somasy 10,3 mlrd teńge bolatyn 8 ınvestjobany iske qosý josparlanǵan. Sonyń arqasynda 596 jumys orny qurylady, — dep atap ótti Natalıa Lıvınskaıa.
Sondaı-aq onyń aıtýynsha, AIA-ǵa qatysýshy kásiporyndar salyqtyń barlyq túrin tóleıdi. «Arnaıy ekonomıkalyq jáne ındýstrııalyq aımaqtar týraly» Zańda kásiporyndar úshin salyqtyq jeńildikter qarastyrylmaǵan. 2016-2025 jyldar aralyǵynda AIA ınvestorlary 95,9 mlrd teńge salyq tólegen.
Eske salaıyq, KAZAKH INVEST ındýstrııalyq aımaqta ınvestıtsııa tartýdyń jańa tetigin iske qosady.