Jalǵa alý talaptaryn saqtamaǵan ALA Hostel jaýapkershiligi qarastyrylýy tıis – prokýratýra
Májilistiń jalpy otyrysynan keıin BAQ ókilderine Bas prokýrordyń orynbasary Jandos Ómirálıev Almaty hostelindegi órtke «Halyq banktiń» qatysy týraly pikir bildirdi, dep habarlaıdy Kazinform.
«Árıne tergeý barysynda munyń bári zerdelenedi. Qazirgi birinshi tarap jatqan aqparat boıynsha, «Halyq banktiń» qasyndaǵy bir fılıalynyń ǵımaraty degen málimet aıtylyp jatyr, ıaǵnı ol odan ári jalǵa bergen. Jalǵa alǵan – «ALA Hostel» degen jaýapkershiligi shektelgen seriktestik. Árıne, birinshi kezekte bul hosteldi osyndaı jalǵa alý talaptaryn saqtamaı otyryp qoldanǵan JShS basshylarynyń jaýapkershiligi qarastyrylýy tıis. Kinásizdik prezýmptsııasy deıdi ǵoı. Men aldyn ala esh nárse aıtpaı-aq qoıaıyn, biraq tergeý barysynda osy órttiń ne sebepti shyqqany týraly jáne onyń saldary tikeleı ǵımarattyń basshylaryna nemese ony jalǵa bergen kompanııanyń basshylaryna qatystylyǵy anyqtalsa, eshkim zańnan qutyla almaıdy», - dedi ol.
Bas prokýrordyń orynbasary tergeý kezinde qazir aıtylyp jatqan aqparattardyń bári tolyq tekseriletinin atap ótti.
«Biraq munyń bárine qazir «mynaý kináli» dep aıtýǵa áli erterek. Sizder BAQ retinde suraǵan soń aıtýym kerek. Ony jarııalaýǵa áli erterek. Naqty qylmystyq is boıynsha aıyp taǵylǵan joq. Sol sebepti kishkene kútý kerek. Biraq osy baǵytta jumys atqarylatynyna men sizderdi sendirgim keledi», - dedi Bas prokýrordyń orynbasary Jandos Ómirálıev.
Eske salaıyq, búgin Almatyda hostel órtenip, 13 adam qaza tapty. Qalalyq tótenshe jaǵdaılar departamentiniń málimetinshe, órt týraly habarlama 30 qarasha kúni saǵat 05:33-te túsken. Birinshi órt sóndirý bólimi shaqyrtý ornyna 7 mınýt ishinde jetti.
Órtten zardap shekken 2 adam qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy. Sondaı-aq 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.
Almatyda hostelde bolǵan órt týraly sońǵy málimetter myna jerde.
