Almaty HQO-da júrgizýshi kýáligine emtıhandy korporatsııa qyzmetkerleri qabyldaıdy

Mamandandyrylǵan halyqqa qyzmet kórsetý ortalyqtarynda teorııalyq emtıhan tapsyrýdyń jańa erejeleri engizildi. Endi emtıhan qabyldaýdaǵy uıymdastyrýshylyq-tehnologııalyq protsesterdi memlekettik korporatsııa júzege asyrady. Buǵan deıin onymen aýtsorsıng kompanııalary aınalysqan, dep habarlaıdy Kazinform.

«Azamattarǵa arnalǵan úkimet» memlekettik korporatsııasy» KEAQ Almaty fılıalynyń málimetinshe, bul jańashyldyq mamandandyrylǵan HQO-da klıentterdiń sapasyz qyzmet kórsetý týraly shaǵymdarynyń jıi túsýimen baılanysty bolyp otyr.

«Osyndaı keleńsizdikterdi joıý úshin memlekettik korporatsııa testileý úderisin derbes uıymdastyrýǵa sheshim qabyldady. Osylaısha, testileýdiń sapasy ǵana emes, qaýipsizdigi de artady. Bul rette, buryn teorııalyq testileý jol qozǵalysy erejeleri 2.0 júıesi arqyly júrgiziledi. 16 qazannan bastap memlekettik korporatsııa jol qozǵalysy erejesiniń jańa 3.0 júıesine kóshti. Onyń arqasynda júrgizýshi kýáligin alý protsesi ashyq ári ádil ótýde» delingen habarlandyrýda.

Teorııalyq emtıhandy tapsyrý kezinde testileý barysy aýdıoǵa jazylyp, vıdeoǵa túsiriledi.

«Sonymen qatar, korporatsııa buǵan deıin emtıhan qabyldaý bólmelerine beınebaqylaý engizgen bolatyn. Bul rette kez kelgen adam kútý zaldarynda da, onlaın rejıminde de ótip jatqan emtıhandy kóre alady. Kómekshi qural-jabdyqtardy paıdalanyp ustalǵan klıentter 3 aıǵa emtıhan tapsyrý quqyǵynan aıyrylǵan aıta ketkimiz keledi» dep atap ótti memlekettik korporatsııadan.

Esterińizge sala ketsek, emtıhannan ótpegen jaǵdaıda kelesi jumys kúni teorııany qaıta tapsyrýǵa bolady.

Eger synaqty eki ret teris nátıjemen tapsyrsa, qaıta tapsyrý tek bir aıdan kem emes merzimde júzege asady.