Almaty HQKO-larynda eń tanymal qyzmet túrleri qandaı

ALMATY. KAZINFORM — Almatynyń Halyqqa qyzmet kórsetý ortalyqtary azamattarǵa 1 mıllıon 400 myńnan astam memlekettik qyzmet kórsetken. 

«Azamattarǵa arnalǵan úkimeti» memlekettik korporatsııasy Almaty fılıalynyń málimetinshe, almatylyqtar arasynda eń suranysqa ıe qyzmet — kólik quraldaryn tirkeý jáne qaıta tirkeý. Bul qyzmet túrine 500 myńǵa jýyq almatylyq júginip, óz kóligin tirkeýden ótkizgen. Ekinshi orynda — jeke kýálik pen tólqujattardy rásimdeý qyzmeti, 266 myń qala turǵyny bul qujattardy alǵan.

— Sondaı-aq júrgizýshi kýálikterin alý jáne aýystyrý qyzmetteri de suranysqa ıe. Bul qyzmet túrine jyl basynan beri 92 myń adam júgingen eken. Ol kólik júrgizý quqyǵyn alǵash ret alǵandar úshin de, qujatyn jańartqysy keletin júrgizýshiler úshin de mańyzdy, — dep habarlady korporatsııasynyń Almaty fılıaly.

Al áleýmettik sala boıynsha 165111 qyzmet alynǵan. Bul baǵytta azamattar járdemaqylar men tólemderdi rásimdeýden bastap, túrli áleýmettik jeńildikter alýǵa deıin jıi ótinish beredi.

Kóp qoldanylatyn taǵy bir qyzmet — elektrondyq tsıfrlyq qoltańba berý. Bul qyzmetti 158 myńnan asa azamat halyqqa qyzmet kórsetý ortalyqtary arqyly alǵan.

Eske salaıyq, buǵan deıin Almatyda azamattardy senbi kúni qabyldaıtyn kezekshi HQKO-lar aýysty.