Almaty hırýrgteri tize baılamy úzilgen sportshyǵa sátti ota jasady
ALMATY. KAZINFORM — 42 jastaǵy Mıroslav Malyhın Almatyda áýe sporty túrlerinen nusqaýshy bolyp jumys isteıdi. Deltaplanmen ushý kezinde ol oń jaq tize býynyn aýyr jaraqattap alǵan. Jaraqat saldarynan birneshe baılam men menısk zaqymdanǵan. Býynnyń turaqtylyǵyn qalpyna keltirip, aıaqtyń qalypty qımyl-qozǵalysyn qamtamasyz etý úshin naýqasqa ota jasaý qajet boldy.
Jaraqat alǵannan keıin Mıroslav birden dárigerge qaralǵan joq. Ýaqyt óte kele aýyrsyný kúsheıip, tize býynynyń turaqsyzdyǵy aıqyn baıqalǵan. Oń aıaǵyna tolyq salmaq túsirip júrý qıyndaǵan. Aýyrsyný deńgeıi on baldyq shkala boıynsha 7 balǵa jetken.
Naýqas Almaty № 4 qalalyq klınıkalyq aýrýhanaǵa júginip, qajetti tekserýlerden ótti. Dárigerler oń jaq tize býynyndaǵy baılamdardyń birneshe jerden zaqymdanǵanyn anyqtady. Atap aıtqanda, aldyńǵy jáne artqy aıqas baılamdary, ishki jáne syrtqy janama baılamdary jyrtylyp, menıski birneshe tustan zaqymdanǵan. Jaraqattyń kúrdeliligin eskere otyryp, mamandar ota jasaýdy usyndy.
Mıroslav MÁMS aıasynda josparly túrde № 4 qalalyq klınıkalyq aýrýhananyń ortohırýrgııa bólimshesine jatqyzyldy.
— Biz artroskopııalyq ádispen artqy aıqas baılamdy naýqastyń óz denesinen alynǵan uzyn shybyq bulshyqetiniń sińirin paıdalanyp qalpyna keltirdik. Іshki janama baılamdy qalpyna keltirý úshin de naýqastyń óz denesinen alynǵan jińishke bulshyqet sińiri paıdalanyldy. Sonymen qatar menısktiń zaqymdanǵan bólikteri ishinara alyndy. Ota artroskopııalyq tásilmen jasaldy. Bul ádis býynǵa úlken tilik jasamaı, shaǵyn tesikter arqyly hırýrgııalyq em júrgizýge múmkindik beredi. Nátıjesinde zaqymdanǵan baılamdardyń bir bóligin qalpyna keltirip, ári qaraı ońaltý sharalaryn júrgizýge jaǵdaı jasadyq, — deıdi Almaty № 4 qalalyq klınıkalyq aýrýhananyń travmatolog-ortoped dárigeri Baýyrjan Nurálıev.
Qazir Mıroslav sportpen aınalysyp, nusqaýshy qyzmetin jalǵastyryp júr. Ol paraplan sportyna áýes, jańadan bastaǵan sportshylarǵa deltaplanmen ushýdyń qyr-syryn úıretedi. Sonymen qatar áýe sharymen ushý boıynsha da nusqaýshy bolyp jumys isteıdi. Mıroslav úshin ol jaı ǵana áýestik emes, ómiriniń ajyramas bóligi. Bul sport túrleri jaqsy dene daıyndyǵyn, qımyl úılesimdigin jáne óz qozǵalysyna senimdi bolýdy talap etedi.
— Men sportpen belsendi aınalysamyn, paraplanmen ushamyn, motosportty unatamyn, hokkeı oınaımyn, basqa da kóptegen sport túrinde ózimdi synap kóremin. Sport — meniń ómirim! Jattyǵý kezinde ushý barysynda tize býynymdy jaraqattap aldym: eki aıqas baılamym men janama baılamdarym zaqymdandy. № 4 qalalyq klınıkalyq aýrýhananyń dárigeri Baýyrjan Bazargeldiuly maǵan birneshe kezeńnen turatyn ota jasaýǵa kelisti. Alǵashqy kezeńde artqy aıqas jáne janama baılamdar qalpyna keltirildi. Aldaǵy ýaqytta ekinshi ota jasalyp, aldyńǵy aıqas jáne syrtqy janama baılamdar qalpyna keltirilýi kerek. Qazir jaǵdaıym turaqty, sportpen aınalysýdy jalǵastyryp júrmin. Em tolyq aıaqtalmasa da, tize býynymnyń turaqtylyǵy jaqsy. Ekinshi ota da birinshisi sııaqty sátti ótedi dep úmittenemin, — deıdi Mıroslav Malyhın.
Artroskopııa — býyn aýrýlary men jaraqattaryn hırýrgııalyq jolmen emdeýdiń zamanaýı, az jaraqattaıtyn ádisi. Ota arnaıy beınekamera men hırýrgııalyq quraldardyń kómegimen teridegi shaǵyn tesikter arqyly jasalady. Bul ádis travmatologııada, sonyń ishinde sporttyq jaraqattardy — menısk, aıqas baılamdar men tize býynynyń basqa da qurylymdarynyń zaqymdanýyn emdeýde keńinen qoldanylady. Ota shaǵyn tilikter arqyly jasalatyndyqtan, aınalasyndaǵy tin az zaqymdanyp, birqatar jaǵdaıda ońaltý sharalaryn erterek bastaýǵa múmkindik týady.
№ 4 qalalyq klınıkalyq aýrýhana Aımaqtyq travmatologııa jáne ortopedııa ortalyǵynyń bazasynda mundaı otalar josparly jáne shuǵyl túrde, sondaı-aq kúndizgi statsıonar jaǵdaıynda jasalady. Jyl basynan beri aýrýhanada osyndaı 550 ota jasaldy.
Eske salaıyq, almatylyq dárigerler 4-qabattan qulaǵan áıeldi aman alyp qaldy.