Almaty haıýanattar baǵyndaǵy janýarlar jer silkinisi kezinde qandaı minez kórsetti

ALMATY. KAZINFORM – Almaty haıýanattar baǵy jer silkinisi kezinde janýarlar qandaı kúıdi bastan keshkeni jaıly áleýmettik jelige jazdy. 

«Túngi ýaqytta zoobaqta kúzet qyzmetkerleri men kezekshi veterınarlardan basqa adam bolmaıdy. Qyzmetkerlerdiń aıtýynsha, jer silkinisine deıin janýarlarda eshqandaı erekshe is-qımyldar baıqalmaǵan. Jer silkinisi bolǵan soń, qasqyrlar ulyp, tyrna, búrkit, qaz, úırek sekildi qustar shýlaı bastaǵan. Tańerteń qyzmetkerlerimiz zoobaqtaǵy jalpy jaǵdaıdy tekserip, barlyq qorshaýlardy baqylap shyqty. Olar qoryqqannan birin-biri qushaqtap, buryshta tyǵylyp otyrǵan Pasha men Lola atty shımpanzelerdiń jubyn kóredi», - dep jazdy zoobaq ujymy.

Sondaı-aq zoobaqtyń málimetinshe, ótken ǵasyrdyń 80-90 jyldary QazSSR Ǵylym akademııasynyń Seısmologııa ınstıtýty mamandarynyń jetekshiligimen Almaty haıýanattar baǵynyń Ǵylymı keńesi jer silkinisin boljaýǵa qatysty zoobaq janýarlary arasynda arnaıy zertteýler júrgizgen.

«Mamandar janýarlardyń jer silkinisi aldynda jáne odan keıingi is-áreketterin, minez-qulyqtaryndaǵy ózgeristerdi zerttegen. Sol kezeńderde qalada adamdarǵa sezilgen 15 jer silkinisi bolǵan eken. 6 túrli janýar jer silkinisi aldynda ádetten tys is-qımyldar jasaǵan. Kóp jaǵdaıda jer silkinisin aldy ala jylandar sezip, belsendi qımyldaǵany baıqalǵan», - dep jazdy Almaty haıýanattar baǵy.