Almaty haıýanattar baǵynda maraldardyń eki tóli dúnıege keldi
ASTANA. KAZINFORM — Bıyl Almaty haıýanattar baǵyndaǵy maraldar áýleti eki birdeı tólmen tolyqty.
Alǵashqy maral tóli 2026 jylǵy 7 maýsymda dúnıege keldi. Oǵan Maraltaı degen esim berildi. Onyń ákesi — Túrkistan, anasy — Alataý.
Al 10 qyrkúıekte dúnıege kelgen ekinshi maral tóline Muqan esimi berildi, onyń ákesi — Saraıshyq, anasy — Chıta.
Qazirgi ýaqytta eki tóldiń de jaǵdaıy jaqsy. Maraltaı men Muqan óz eneleriniń janynda ósip keledi. Haıýanattar baǵynyń mamandary tólderdiń densaýlyǵyn, damýyn jáne qorektenýin kúndelikti baqylaýda ustap, olarǵa qajetti kútim jasap jatyr.
— Maraldardyń dúnıege kelýi — bizdiń ujym úshin úlken qýanysh. Árbir tóldiń deni saý bolyp ósýi — mamandar úshin basty mindet. Qazirgi tańda Maraltaı men Muqan tolyqtaı mamandardyń qaraýynda. Olardyń jaǵdaıy kúndelikti baqylaýda, qajetti kútim men veterınarııalyq baqylaý júrgizilip otyrady. Tólder óz eneleriniń janynda ósip, tabıǵı minez-qulyqtaryn qalyptastyryp jatyr, — dedi Almaty haıýanattar baǵynyń tuıaqty janýarlar bóliminiń basshysy Nurtaı Sársenbaev.
Zoobaqtyń habarlaýynsha, maraldardyń kóbeıýi — Almaty haıýanattar baǵyndaǵy janýarlardy saqtaý jáne kóbeıtý baǵytyndaǵy jumystardyń mańyzdy nátıjeleriniń biri. Janýarlarǵa qolaıly jaǵdaı jasaý, olardyń densaýlyǵyn baqylaý jáne tabıǵı erekshelikterine saı kútim kórsetý — haıýanattar baǵy mamandarynyń kúndelikti jumysynyń negizgi baǵyttarynyń biri.
Haıýanattar baǵy qala turǵyndary men qonaqtaryn jańa kishkentaı turǵyndarmen tanysyp, olardyń úlken ómirge jasaǵan alǵashqy qadamdaryn tamashalaýǵa shaqyrady.
Eske salaıyq, buǵan deıin Almaty zoobaǵynda shaıqaǵysh janattar keıingi 20 jylda alǵash ret tóldegenin jazǵanbyz.
