Almaty haıýanattar baǵynda kerqulan qulyndady
ALMATY. KAZINFORM — Almaty haıýanattar baǵynda kerqulannyń (Prjevalskıı jylqysy) Qurbankúl atty bıesi qulyndady. Qulynǵa Jelmaıa dep at qoıyldy. Bul — Qurbankúldiń ekinshi tóli.
Zoobaq ókilderiniń aıtýynsha, bul qulynnyń dúnıege kelýi erekshe mańyzǵa ıe. Sebebi kerqulan — Qazaqstan Respýblıkasynyń Qyzyl kitabyna jáne Tabıǵatty qorǵaýdyń halyqaralyq odaǵynyń (IUCN) Qyzyl tizimine engizilgen, álemdegi eń sırek kezdesetin jabaıy jylqy túrleriniń biri. Haıýanattar baǵynda onyń tólin alý osy túrdiń genetıkalyq ártúrliligin saqtaýǵa jáne turaqty popýlıatsııasyn qalyptastyrýǵa baǵyttalǵan halyqaralyq tabıǵat qorǵaý baǵdarlamalarynyń mańyzdy bóligi sanalady.
Almaty haıýanattar baǵy sırek kezdesetin jáne joıylyp ketý qaýpi tóngen janýarlardy saqtaý jónindegi halyqaralyq baǵdarlamalarǵa qatysady. Olardyń qatarynda aqbóken, aq aıý, aqıyq qyran jáne kerqulan bar.
— Prjevalskıı jylqysynyń árbir qulynynyń dúnıege kelýi — mamandarymyzdyń uzaq jylǵy qajyrly eńbeginiń nátıjesi. Janýarlarǵa barynsha qolaıly jaǵdaı jasalyp, juptar halyqaralyq asyl tuqymdy baǵdarlama usynymdaryna sáıkes irikteledi, turaqty veterınarııalyq baqylaý júrgiziledi. Árbir qulynnyń aman-esen dúnıege kelýi atqarylǵan jumystyń nátıjeli ekenin jáne álemde saqtalyp qalǵan jalǵyz jabaıy jylqy túrin qorǵaýǵa úles qosyp otyrǵanymyzdy kórsetedi, — deıdi Almaty haıýanattar baǵy dırektorynyń zooveterınarııalyq bólim jónindegi orynbasary Aǵybaı Ájibaev.
Janýarlardyń tynyshtyǵyn saqtaý maqsatynda kerqulan otbasy kelýshilerge jabyq arnaıy tynysh aımaqta ustalady. Qazirgi ýaqytta Qurbankúl, qulyn Jelmaıa jáne aıǵyr Mereı mamandardyń turaqty baqylaýynda. Bıeniń de, qulynnyń da jaǵdaıy jaqsy, tól qalypty damyp keledi.
Eske salaıyq, buǵan deıin Almaty haıýanattar baǵynda aqbókender laqtaǵanyn habarlaǵanbyz.
