Almaty haıýanattar baǵynda aqbókender laqtady
ALMATY. KAZINFORM — Almaty haıýanattar baǵynda Stella men Aına esimdi aqbókender laqtady. Bul týraly qalalyq Mádenıet basqarmasy habarlady.
Aqbóken (Saiga tatarica) – muz dáýirinen beri jer betinde saqtalyp kele jatqan janýarlar dúnıesiniń eń kóne ókilderiniń biri. Qazirgi tańda bul sırek túr erekshe qorǵaýǵa alynyp, tabıǵatty saqtaý turǵysynan mańyzdy mártebege ıe.
Mamandardyń aıtýynsha, jańa týǵan laqtardyń jaǵdaıy jaqsy. Olar ósip-jetilip, analarynan bir eli ajyraǵan emes. Ázirshe tólder ana sútimen qorektenip jatyr. Al ýaqyt óte kele tabıǵı ósimdik tektes azyqqa birtindep beıimdeledi.
— Almaty haıýanattar baǵy — aqbókenderdi qolda ósirip, turaqty túrde tól alyp otyrǵan sanaýly zoologııalyq mekemeniń biri. Mamandar muny sırek kezdesetin janýar túrin saqtaýǵa jáne bıologııalyq alýandyqty qorǵaýǵa baǵyttalǵan jumystyń mańyzdy nátıjesi retinde baǵalaıdy, - delingen ákimdiktiń baspasóz qyzmeti taratqan habarlamada.
Qazir laqtardyń jasy shamamen bir aıǵa taıaǵan. Olar veterınar mamandardyń turaqty baqylaýynda bolyp, jasyna saı damyp keledi.
Eske salaıyq, buǵan deıin Almaty haıýanattar baǵynda birden birneshe sırek janýardyń tóli dúnıege kelgeninin habarlaǵanbyz.
Janýarlardyń belsendi kóbeıetin kezeńinde aqqol gıbbondar men saqınaly quıryqty lemýrlar urpaq órbitti.
