Almaty haıýanattar baǵynda 31 túrli janýardan 87 tól dúnıege keldi
ALMATY. KAZINFORM – Almaty haıýanattar baǵynda aýqymdy jańǵyrtý jumystary júrgiziledi.
Almaty qalasy mádenıet basqarmasynyń basshysy Danııar Alıevtiń aıtýynsha, aýmaǵy 21 gektardy qamtıtyn haıýanattar baǵynda qazirgi ýaqytta 385 túrge jatatyn 4 myńnan astam janýar, qus jáne baýyrymen jorǵalaýshylar bar. Olardyń 76 túri Halyqaralyq tabıǵatty qorǵaý odaǵynyń qaýipsizdik tizimine, al 24 túri Qazaqstan Respýblıkasynyń Qyzyl kitabyna engizilgen.
Sonymen qatar 2025 jyly qalalyq haıýanattar baǵynda 31 túrli janýardan 87 tól dúnıege kelgen. Zoobaq kollektsııasy jańa jáne sırek kezdesetin bızon, tamandýa, tsıveta, geneta, agama sııaqty túrlermen tolyqtyrylǵan.
– 2025 jyly zoobaqqa kelýshiler sany 1,2 mıllıon adamǵa jetti. Bul bizdiń zoobaqtyń eldegi jáne aımaqtaǵy tanymaldyǵyn aıqyn kórsetedi. Jyl saıyn kelýshiler sanynyń ósýi – bizdiń jumystarymyzdyń jáne tabıǵatty qorǵaý mıssııamyzdyń kórinisi, - dedi basqarma basshysy.
Danııar Alıev 2025 jyly Almaty haıýanattar baǵy Eýropalyq zoobaqtar men akvarıýmdar qaýymdastyǵynyń tolyqqandy múshesi retinde qabyldanǵanyn atap ótti. Onyń aıtýynsha, bıyl Almaty haıýanattar baǵy bıyl aýqymdy rekonstrýktsııadan ótedi. Joba júzege asyrylǵan soń, zoobaq jylyna 2 mln adamdy qabyldaı alady.
Eske salaıyq, Almaty zoobaǵy Ońtústik Amerıkadan kelgen erekshe janýarmen tolyqty.