Almaty haıýanattar baǵyna kanadalyq sileýsinder ákelindi
ALMATY. KAZINFORM – Almaty zoobaǵyna kanadalyq sileýsinderdiń juby ákelindi. Bul týraly Almaty ákimdigi habarlady.
Janýarlar AQSh-tan halyqaralyq janýarlar almasý baǵdarlamasy aıasynda jetkizildi. Keri baǵytta zoobaq qorynan jyrtqysh qustar berildi.
- Sileýsinder mindetti karantınnen jáne veterınarlyq baqylaýdan ótti. Qazirgi ýaqytta janýarlar jańa ortaǵa tolyq beıimdelip, kelýshiler nazaryna usynylyp otyr, - dep habarlady ákimdikten.
Resmı málimetke sáıkes, erkek sileýsinniń jasy – 3-te, al urǵashysy – 7 jasta. Jańa turǵyndar «leopardtar sheńberi» dep atalatyn aýmaqtaǵy usaq jyrtqyshtarǵa arnalǵan volerler keshenine ornalastyrylǵan. Olarǵa qolaıly jaǵdaı jasaý maqsatynda keń voler, jasyrynýǵa arnalǵan úıshik, salqyndatqysh jáne salqyndatqysh tuman júıesi qarastyrylǵan. Janýarlardyń ratsıonyna balyq, sıyr eti jáne taýyq eti kiredi.
- Kanadalyq sileýsin – Soltústik Amerıkanyń soltústik aımaqtaryn mekendeıtin mysyq tuqymdasynyń erekshe ókili. Bul jyrtqysh óziniń tózimdiligimen jáne qatal klımattyq jaǵdaıǵa joǵary beıimdiligimen erekshelenedi. Túrdiń basty belgilerine qulaq ushyndaǵy uzyn shashaqtar, qalyń jún jáne qalyń qarda erkin qozǵalýǵa múmkindik beretin jalpaq tabandar jatady, - delingen ákimdik aqparatynda.
Eske salaıyq, buǵan deıin Almaty jurtyn zoobaqtaǵy aq aıýdyń jaǵdaıy alańdatqanyn jazǵanbyz.
