Almaty halyqaralyq áýejaıyna kásipkerlerden shaǵym tústi: tergeý júrip jatyr

ASTANA. KAZINFORM — Básekelestikti qorǵaý jáne damytý agenttiginiń eskertýin elemegen Almaty halyqaralyq áýejaıyna qatysty tergeý amaldary júrgizilip jatyr.

— Bizge kásipkerlerden Almaty halyqaralyq áýejaıynyń básekelestikti shekteýine qatysty shaǵymdar tústi. Áýejaı aýmaǵynda qyzmet kórsetetin jetkizýshilerdi tańdaý protsesinde monopolııaǵa qarsy zańnamany buzý belgileri anyqtaldy. Anyqtalǵan faktiler boıynsha agenttik eskertý shyǵardy, alaıda ol oryndalmady, — dedi Básekelestikti qorǵaý jáne damytý agenttigi tóraǵasynyń orynbasary Bolat Sámbetov Senat qabyrǵasynda ótken is-shara barysynda. 

Onyń aıtýynsha, qazir áýejaıǵa qatysty tergeý sharalary júrip jatyr. 

Aıta ketsek, Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn iske asyrý sheńberinde Senatta «Qazaqstan Respýblıkasynda azamattyq avıatsııany damytý» taqyrybyna arnalǵan dóńgelek ústel ótti.

Eske sala keteıik, byltyr maýsymda Almaty áýejaıynyń jańa termınaly alǵashqy reısterdi qabyldaı bastady. 

Ótken jyly kúzde Almaty áýejaıynyń eski jáne jańa termınaly arasynda kópir ashyldy. 

Bıyl aqpanda áleýmettik jelilerde Almatynyń jańa halyqaralyq termınal ǵımarattarynyń birinde sý aǵyp jatqany beınelengen vıdeo taraǵan edi.