Almaty halyqaralyq áýejaıy qalypty rejımde jumys istep jatyr

ALMATY. KAZINFORM — Almaty halyqaralyq áýejaıy ózin-ózi órtemek bolǵan jolaýshynyń oqıǵasyna qatysty túsinik berdi.

Áýejaıdyń baspasóz qyzmetiniń málimetinshe, polıtsııa qyzmetkerleri men avıatsııalyq qaýipsizdik qyzmetiniń jedel áreketiniń arqasynda órt tez arada sóndirilip, jolaýshyǵa alǵashqy medıtsınalyq kómek berildi. Ol aýrýhanaǵa jetkizilgen.

Oqıǵanyń mán-jaıyn quqyq qorǵaý organdary anyqtap jatyr.

— Bul oqıǵa áýejaıdyń qyzmetine baılanysty emes jáne áýe aılaǵynyń jumysyna áser etpedi. Almaty halyqaralyq áýejaıy qalypty rejımde jumys istep tur, — delingen habarlamada.

Eske salaıyq, buǵan deıin Almaty halyqaralyq áýejaıynda bir er adamnyń kassa janynda ózin órtemek bolǵanyn habarlaǵan edik. Polıtseıler der kezinde áreket etip, qaıǵyly jaǵdaıdyń aldyn aldy. Atalǵan fakti boıynsha qylmystyq is qozǵaldy.