Almaty garnızonynyń áskerı qyzmetshileri Bıbigúl Tólegenovany quttyqtady
Áskerıler ataqty opera ánshisin 94 jasymen quttyqtap, kezdesý memlekettik merekemen tuspa-tus keldi, dep habarlaıdy Kazinform QR Qorǵanys mınıstrliginiń baspasóz qyzmetine silteme jasap.
Saǵadat Nurmaǵambetov atyndaǵy Qurlyq áskerleri áskerı ınstıtýtynyń kýrsanttary men Qarýly kúshter Ulttyq áskerı-patrıottyq ortalyǵynyń Almaty fılıalynyń ánshisi Arýjan Alpysbaeva týǵan kún ıesine arnap tanymal ánshiniń óz repertýarynan ánder shyrqady.
Bıbigúl Tólegenova esimi qazaqqa ǵana emes, jaqyn jáne alys sheteldeni ónersúıer qaýymǵa keńinen tanymal. Ol kıno áleminde de eleýli iz qaldyrdy jáne birneshe býyn shákirt tárbıeledi.
Bıbigúl Ahmetqyzy jankúıerlerin ór rýhymen, tabandylyǵymen jáne aqyl-oıynyń ushqyrlyǵymen tań qaldyryp keledi. Ánshi áskerı qyzmetshilerdiń jyly lebizine rıza bolyp, olarǵa óziniń shyǵarmashylyǵy týraly áńgimelep berdi.
– Áskerı mamandyq Otanǵa shyn berilip adal qyzmet etýdi talap etedi jáne árdaıym ómiriń táýekel etýmen baılanysty. Bir jaǵynan, bul er-azamatty shyńdaıdy, ekinshi jaǵynan bul qyzmet abyroıly mártebe. Eger siz kásibı áskerı qyzmetshi bolam deseńiz, onda osy maqsatqa jetýde tabandylyq kórsetip, Otan ıgiligi úshin oqyp, eńbek etýińiz kerek, – dedi Bıbigúl Tólegenova.
Qazaqtyń bulbuly Qarýly kúshterdiń barlyq áskerı qyzmetshilerin Táýelsizdik kúnimen shyn júrekten quttyqtap, zor densaýlyq pen beıbit aspan tiledi.