Almaty garnızonynda Sarbaz+ iske qosyldy
ASTANA. KAZINFORM — Qazaqstan Respýblıkasy qorǵanys vedomstvosynyń basshysy avıatsııa general-leıtenanty Dáýren Qosanov pen Parlament depýtattary Almaty garnızonyna sapary barysynda 78460 áskerı bóliminiń bazasynda iske qosylǵan Sarbaz+ ınnovatsııalyq jobasymen tanysty. Bul týraly vedomstvonyń baspasóz qóyzm eti málim etti.
— Sarbaz+ jobasy merzimdi áskerı qyzmetti jańǵyrtýǵa, armııanyń bedelin arttyrýǵa jáne suranysqa ıe mamandardy daıarlaýǵa baǵyttalǵan. Qonaqtarǵa beıneanalıtıka júıesi, Rtel radıobaılanys mamandaryn, ushqyshsyz basqarylatyn Ashik Aspan qurylǵylarynyń operatorlaryn jáne Eltex tehnologııalyq júıelerin daıarlaýdyń oqý synyptary kórsetildi, — delingen habarlamada.
Sonymen qatar, merzimdi qyzmettegi sarbazdar ártúrli bilim berý baǵdarlamalary men kýrstaryna qatysady. TechOrda baǵdarlamasy boıynsha Astana Hub-pen yntymaqtastyq aqparattyq qaýipsizdik taldaýyn, derekterdi qorǵaýdy jáne UUA basqarý úshin jasandy ıntellekt tehnologııalaryn úırenýge múmkindik beredi. Budan basqa QLANG onlaın-platformasynda aǵylshyn tili kýrsy ótkiziledi.
Qorǵanys vedomstvosynyń basshysy men bólimge barǵan qonaqtarǵa joba ınfraqurylymynyń elementteri: Workout sport alańdary, strıtbolǵa arnalǵan aımaqtar, trenajer zaly, qoıan-qoltyq urys klýby jáne elektrondy tır kórsetildi. Oǵan qosa tsıfrlyq servıster — Aı-sulý telegram-boty jáne ARMIA.KZ aqparattyq platformasy tanystyryldy.
— Sarbaz+ tehnologııany, ınfraqurylymdy damytyp, adam kúshin sanaly jumsaýǵa baǵyttalǵan. Biz qyzmettiń zaman talabyna saı jáne áskerı qyzmetshilerdiń kásibı ósýi úshin múmkindikter jasaımyz, — dep atap ótti Dáýren Qosanov.
Jobany Parlament Senatynyń depýtaty Ǵalıasqar Sarybaev oń baǵalady. Onyń aıtýynsha, Sarbaz+ armııany modernızatsııalaýǵa júıeli kózqarastyń mysaly bolyp tabylady jáne adamı kapıtaldy damytýdyń strategııalyq mindetterine jaýap beredi.
— Búgin merzimdi qyzmet tek tártip pen patrıotızm mektebine ǵana emes, zaman talabyna saı quzyretteri bar alańǵa aınalǵanyn kórip otyrmyz. Sarbaz+ jobasy básekege qabiletti mamandardy qalyptastyryp, jastardyń Qarýly kúshterge degen senimin arttyrady, — dep atap ótti senator.
Sarbaz+ jobasy jastar men jalpy qoǵam úshin tartymdy armııanyń zamanaýı kelbetin qalyptastyrýǵa baǵyttalǵan. Onyń kómegimen merzimdi qyzmettiń áskerı qyzmetshilerin oqytý jáne tárbıeleý ádisterin jańǵyrtý júzege asyrylady. Jobaǵa qatysý arqyly sarbazdar zapasqa shyǵarylǵannan keıin talap etiletin daǵdylardy jáne jumysqa sátti ornalasý biliktiligine ıe bola alady. Uıymdastyrýshylar bul joba sátti iske assa, Qarýly kúshterdiń barlyq áskerı bólimderinde jańa bastamaǵa jol ashatynyna senimdi.
Búgingi tańda jobanyń paıdaly bolatyny jaıly mynadaı mysaldar keltirýge bolady: myarmy.kz portaly arqyly 268 ótinim berilip, 90 sarbaz iriktelgen. Bul bir orynǵa 3 adam talasty degen sóz. Demek, aldaǵy ýaqytta jastardyń jobaǵa degen qyzyǵýshylyǵy artatyny sózsiz.
Aıta keteıik, áskerı qyzmetshiler drondardy qurastyrý men basqarýdy úırenip jatyr.