Almaty energetıkteri aqyldy kaskamen jumys isteı bastady
ASTANA. KAZINFORM — Elektr jelilerindegi jumys qaýipsizdigin baqylaý úshin Almatyda 268 ekshn-kamera qoldanysqa engizildi. Jańa tehnologııa mamandardyń jumys barysyn qashyqtan baqylaýǵa múmkindik beredi. Bul týraly Energetıka mınıstrligi málim etti.
Vedomstvo energetıkalyq ınfraqurylym nysandaryndaǵy qaýipsizdikti arttyrý jáne óndiristik jaraqattanýdyń aldyn alý baǵytynda júıeli jumystar júrgizip jatyr.
«Alataý Jaryq Kompanııasy» AQ elektr jelilerinde jumystardy oryndaý kezinde qaýipsizdikti arttyrý jáne óndiristik jaraqattanýdyń aldyn alý maqsatynda ekshn-kameralar engizgen.
— 2024 jyly pılottyq joba aıasynda alǵashqy ekshn-kameralardy paıdalana bastady. Búgingi tańda olardyń jalpy sany 268-ge deıin jetti, — delingen habarlamada.
Qazirgi ýaqytta Almaty qalasy men Almaty oblysyndaǵy elektr jelileri aýdandarynyń (ETA) barlyq jedel-kóshpeli brıgadalary aqyldy kaskalarmen jabdyqtalǵan. Sheberler brıgadalaryn jabdyqtaý jumystary jalǵasýda.
Kameralar qaýipsizdik talaptarynyń saqtalýyn naqty ýaqyt rejıminde baqylaýǵa múmkindik beredi. ETA basshylary, dıspetcherler jáne eńbekti qorǵaý mamandary yqtımal qaýip-qaterlerdi jedel anyqtap, qajet bolǵan jaǵdaıda jumystardy toqtatýdy talap ete alady. Sonymen qatar beınejazbalar turaqty túrde taldanyp, anyqtalǵan buzýshylyqtar boıynsha qyzmetkerlermen túsindirý jumystary júrgiziledi jáne qosymsha nusqamalar beriledi.
Ekshn-kameralardy engizý eńbekti qorǵaý talaptarynyń saqtalýyn baqylaýdy kúsheıtýge, qaýipti jaǵdaılardy ýaqtyly anyqtaýǵa jáne óndiristegi jazataıym oqıǵalardyń aldyn alý sharalaryn qabyldaýǵa kómektesedi.
