Almaty elektr stantsııalary qosymsha qyzmetpen energııany mindettep satqany úshin tekserilip jatyr
ALMATY. KAZINFORM – Almatyda monopolııaǵa qarsy organ básekelestikti buzýdyń jolyn kesý boıynsha júrgizilgen jumystyń qorytyndysy boıynsha ústem nemese monopolııalyq jaǵdaıdy teris paıdalanýdyń toǵyz deregi boıynsha negizgi yqpal etý sharalary qabyldandy.
Bul týraly Básekelestikti qorǵaý jáne damytý agenttiginiń Almaty boıynsha departamentiniń basshysy Nurjan Nurlanuly aıtty.
Úlken dúrbeleń týdyrǵan istiń biri – «Almaty elektr stantsııalary» AQ-ǵa qatysty kóterme elektr energııasyn ótkizý naryǵyndaǵy tergeý. Kompanııa Almaty ındýstrııalyq aımaǵynda atalǵan qyzmetti tehnıkalyq turǵyda kórsetý múmkindigi bolmaǵanyna qaramastan, elektr energııasyn jetkizýshi uıymdy enshiles kompanııanyń jelisi arqyly berip, qosymsha qyzmetpen birge satyp alýdy mindettegeni anyqtaldy. Bul aımaqta jumys isteıtin 118 kásiporynǵa, jalpy ınvestıtsııa kólemi 400 mlrd teńgeden asatyn rezıdentterge qosymsha júkteme túsirgen.
– Mundaı sharttar energııa qoryna jumsalatyn shyǵyndy azaıtýǵa baǵyttalǵan memlekettik qoldaýdyń tıimdiligin is júzinde joqqa shyǵardy. Sot departament qorytyndylaryn zańdy dep tanyp, túpkilikti sheshim qabyldanǵan jaǵdaıda júzden astam kásipkerdiń quqyǵy qorǵalady, - dedi Nurjan Nurlanuly.
Taǵy bir mysal – «INVIVO Business» JShS-ne qatysty. Franchaızıng sharttarynda kelisimshart buzylǵannan keıin 24 aı boıy básekelestermen yntymaqtastyq jasaýǵa shekteý qoıý normalary anyqtalǵan. Eskertý engizilgennen keıin kompanııa tıisti tarmaqtardy alyp tastady. Nátıjesinde elimizdiń 16 qalasyndaǵy zerthanalyq qyzmetter naryǵynda jumys isteıtin 143 sýbektiniń quqyqtary qorǵaldy.
Jylýmen jabdyqtaý salasynda departament «Almaty jylý júıesi» JShS-nen de zańbuzýshylyq anyqtaldy: jylý energııasyna qaıta qosý kezinde tarıfke 10% mólsherinde paıda qosylǵan, qoldanystaǵy qaǵıdalar tek naqty shyǵyndardy óteýdi kózdeıdi. Nátıjesinde Almaty turǵyndary úshin qyzmet quny 10%-ǵa tómendetildi.
Eske salaıyq, buǵan deıin Almatyda monopolııaǵa qarsy organ FlyArystan áýe kompanııasyna qatysty tergeý bastaǵanyn jazǵanbyz.
Oǵan sebep – qol júginiń artyq salmaǵy úshin biryńǵaı tarıftiń qoldanylýy.