«Almaty elektr stantsııalary» 4,4 mlrd teńge aıyppul tóleıdi

ALMATY. KAZINFORM — Almaty qalasynyń Indýstrııalyq aımaǵynda qyzmet júrgizetin naryq sýbektileriniń quqyqtaryn qorǵaý maqsatynda Básekelestikti qorǵaý jáne damytý agenttiginiń Departamenti «Almaty elektr stantsııalary» AQ-qa qatysty ústem jaǵdaıdy teris paıdalaný belgileri boıynsha tergep-tekserý júrgizdi. 

Indýstrııalyq aımaq — Almaty qalasynda basym salalardy damytý jáne jeke kásipkerlikke memlekettik qoldaý kórsetý maqsatynda qurylǵan. Qazirgi ýaqytta onyń aýmaǵynda 118 kásipkerlik sýbektisi tirkelgen, al ınvestıtsııalar kólemi 400 mlrd teńgeden asady. Energııa resýrstaryn tartý men tutynýǵa ketetin shyǵyndardy azaıtý úshin memleket tarapynan JES-2 jelilerine tikeleı qosylǵan elektr jelileri júrgizilgen.

Alaıda, «AlES» AQ Indýstrııalyq aımaq aýmaǵynda qalalyq elektr jelileri bolmaǵanyna qaramastan, energııamen jabdyqtaýshy uıymdy affılıırlengen energııa jetkizýshi uıymnyń jelileri arqyly elektr energııasyn jetkizý qyzmetimen birge satyp alýǵa mindettegen.

— Tergep-tekserý nátıjesinde «AlES» AQ-ǵa qatysty ÁQBtK-niń 159-babynyń 3-1-bóligine sáıkes ákimshilik quqyqbuzýshylyq týraly is qozǵaldy. Іs materıaldary Almaty qalasynyń mamandandyrylǵan aýdanaralyq ákimshilik sotyna joldanyp, sot sheshimimen «AlES» AQ 4,4 mlrd teńge kóleminde ákimshilik aıyppul salý túrinde jaýapkershilikke tartyldy. Qazirgi ýaqytta sottyń qaýlysy zańdy kúshine engen joq, — delingen Básekelestikti qorǵaý jáne damytý agenttigi habarlamasynda. 

Aıta ketelik Petropavlda TÚKSh bóliminiń basshysyna 3 mln teńge aıyppul salyndy.