«Almaty-Ekaterınbor» trassasynda jol apatynan 3 adam kóz jumdy

KÓKShETAÝ. KAZINFORM – Aqmola oblysy aýmaǵynda «Almaty-Ekaterınbor» trassasynda eki kólik soqtyǵysyp, 3 adam kóz jumdy. 

Aqmola oblysy PD baspasóz qyzmetiniń málimetinshe, jol apaty 30 sáýirde «Almaty-Ekaterınbor» tas jolynyń 1201 shaqyrymynda Tasty jáne Qaramendi batyr aýyldary arasynda bolǵan.

Anyqtalǵandaı, «Audi A6» jeńil kóligimen «GAZel» soqtyǵysqan. Saldarynan jeńil kóliktiń 35 jastaǵy júrgizýshisi men eki jolaýshysy alǵan dene jaraqatynan oqıǵa ornynda kóz jumdy. 

«Qazirgi kezde osy oqıǵaǵa baılanysty Qylmystyq kodekstiń 345 baby boıynsha is qozǵalyp, sotqa deıingi tergeý sharalary qolǵa alynǵan. Sonymen birge tıisti saraptamalar taǵaıyndaldy», - dep túsindirdi vedomstvodan. 

Aıta ketsek, budan buryn osy «Ekaterınbor-Almaty» tasjolynda jol apaty bolyp, 5 adam qaza tapqan edi.