Almaty eki avtobýs soqtyǵysyp qaldy: zardap shekkender bar

ALMATY. KAZINFORM – Almatynyń Medeý aýdanynda qoǵamdyq kólikter jol-kólik oqıǵasyna ushyrady.

Qalalyq polıtsııa departamentiniń málimetinshe, búgin saǵat 12:40 shamasynda Raıymbek dańǵylymen shyǵys baǵytta kele jatqan №69 avtobýs aıaldamada turǵan №208 baǵyttaǵy avtobýspen soqtyǵysqan.

- Jol apaty saldarynan №69 baǵyttaǵy avtobýstyń júrgizýshisi men jolaýshy medıtsınalyq kómekke júgindi. Apattyń mán-jaıyn Medeý aýdandyq polıtsııa basqarmasynyń qyzmetkerleri anyqtaıdy, – dep habarlady polıtsııa departamentinen.

Eske salaıyq, buǵan deıin ІІM jol apatyna jıi ákeletin jaıttardy atady. Olar: jyldamdyqty arttyrý, qarsy jolaqqa shyǵyp ketý, mas kúıinde kólik júrgizý jáne jaıaý júrginshilerdiń joldy tótesinen kesip ótýi. Bıyl tek jyldamdyq rejımin buzý saldarynan 406 adam, qarsy jolaqqa shyǵý sebebinen 400 adam, al joldy ruqsat etilmegen jerden ótken 67 adam qaza tapqan.